भांगरभूंय | प्रतिनिधी
पणजी : आधुनीक तंत्रज्ञानाचो फायदो घेवन दुकानदाराक फटोवन, उपरांत पर्यटनाच्या नांवान गोंयांत येवन मजा घेवपी गुन्यांवकाराक गोंय पुलिसांनी अटक केली. केरळांतल्या एका नामनेच्या भांगराच्या दुकानांत बनावट ऑनलायन पेमेंटाचो स्क्रीनशॉट दाखोवन लाखांनी रुपयांच्यो भांगरा वस्ती घेवन पळून गेल्लो गुन्यांवकाराक गोंय गुन्यांव फांट्यान गोंयांत कळंगुटे एका हाय प्रोफायल पार्टींत अटक केल्या. पुलिसांनी चोराचो सोद घेवन ताचे कडल्यान चोरयेच्यो सगळ्यो वस्ती मेळयल्यात.
हे विशीं चड म्हायती प्रमाण, केरळच्या कासरगोड जिल्ह्यात बाकेल पोलीस स्थानकांत २७ मे २०२६ दिसा एका खांप्या गुन्यांवकारा आड विश्वासघात आनी फटींपणाचो गुन्यांव दाखल केल्लो. तांणी एका भांगराच्या दुकानांत गिराक जावन प्रवेश केलो. सामकें बारकायेन तांणी मोलादीक मुदयो आनी हार निवडलो. मात, पयशे दिवपाची वेळ आयली तेन्ना तांणी दुकानदाराक फाटोवन मोबायलाचेर एक बनावट ऑनलाइन ट्रान्झॅक्शन येसस्वी जाल्ल्याचें दाखयलें आनी दुकानदाराक कितेंय कळचे पयलींच थंयच्यान गायब जालो.
केरळ पुलीस गुन्यांव तपास खात्याक चवकशे वेळार ह्या दुबाविताची विशिश्ट ‘मोडस ऑपरेंडी’ (गुन्यांव करपाची पद्दत) मेळ्ळी. दुबावीत खंयच्याय सुवातेर व्हडल्यो चोरयो वा फटींगपणां करून सरळ गोंयांत पळून येतालो आनी चोरिल्ले पयशे हांगच्या कॅसिनो वा व्हडल्या पार्ट्यांनी खर्च करतालो. केरळ पुलिसांनी ही म्हत्वाची सुचोवणी गोंय पुलिसांच्या गुन्यांव फांट्याक दिली. ही म्हायती मेळटकच गुन्यांव फांट्याचे पुलीस अधीक्षक (एसपी क्रायम) राहुल गुप्ता हांणी पुराय गोंयांत हाय-अलर्ट जारी करून चवकशेक गती दिली.
गुन्यांव फांट्याचे निरीक्षक दत्तगुरू सावंत हांच्या नेतृत्वाखाला सहाय्यक उपनिरीक्षक दिनेश पिकुळकार, हवालदार संदीप मडकयकार तशेंच कळंगूट पुलीस स्थानकाचे हवालदार विद्यानंद आमोणकार, गणपत तिळोजी आनी आमिर गराड हांच्या एका विशेश पंगडान पणजी आनी कळंगूटे वाठारांतले सगले मुखेल कॅसिनो, पब आनी पार्टी क्लबाच्या वेवस्थापनाक दुबाविताचें वर्णन दिवन सतर्क केले.
मजगतीं, शेनवारा ३० मेक पुलिसांक दुबावीत आरोपी कळंगूटे एका व्हडा पर्टेक आशिल्ल्याची म्हायती मेळ्ळी. पुलिसांनी कपडे दुसरे घालून ते सुवातेर घेरो घातलो आनी केरळांतलो तोच गुन्यांवकार आशिल्ल्याची खात्री करून ताका अटक केली. गोंयाञत पयलींच येवन राविल्ल्या केरळांतल्या पुलिसांनी गुन्यांवगारा कडल्यान मुदयो आनी हेर भांगरा वस्ती जप्त केल्यो.
हे चवकशेंत गोंय पुलिसांनी दाखयल्ली शिटूकसाण, वेवसायीकपण आनी आंतरराज्य समन्वय पळोवन केरळांतल्या एका वरिश्ठ आयपीएस अधिकार्यान, जो केशीचेर व्यक्तिगत नदर दवरता, ताणें गोंय पुलिसांचे जाहीर उपकार मानल्यात आनी तांच्या कामगिरीची तोखणाय केल्या. फुडली कायदेशीर कारवाय करपा खातीर केरळ पुलीस दुबाविताक घेवन केरळाक वचपाक भायर सरल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
