भांगरभूंय | प्रतिनिधी
जोयडा : बेळगांवच्यान गोंयांत येवपी एका भांगरा वस्ती करपी कारागिराक वाटेर आडावन, ताका गांवठी पिस्तुल आनी सुर्याचो भंय दाखोवन ताचे कडल्यान २२५ ग्रॅम भांगर आनी पयशे लुटले. खानापूर पुलिसांनी आतां हें प्रकरण उक्तडार हाडलें. ह्या पुराय प्रकरणांत सगल्यांत धक्को दिवपी गजाल म्हळ्यार, पिडेस्त कारागिरा वांगडा गाडयेंतल्यान प्रवास करपी ताचे सामके विस्वासू दोग इश्टूच ह्या पुराय दरोड्याचे मुखेल सुत्रधार आशिल्ल्याचें तपासा वेळार समजलें. पुलिसांनी ह्या प्रकरणांत वट्ट आठ जाणांचे टोळयेक अटक केल्या. तशेंच तांचे कडल्यान गांवठी पिस्तुल आनी हेर सामान जप्त केलां.
पुलिसां दिल्ले म्हायती प्रमाण, ही घडणून २० मेक सांजेवेळार उचवडेच्या (ता. खानापूर) बैलूर क्रॉस वाठारांत घडली. मूळ अस्तंत बंगालांतलो आनी सध्या बेळगांवां शहापूर वाठारांत रावपी भांगरा वस्ती करपी कारागीर एस. के. इबादुल हे वेवसायीक कांय कारणाक लागून गाडयेन आपले इश्ट रबीउल गाझी आनी अलीहुसेन मंडल हांचे सयत गाडयेन गोंयांत येताले. गाडी बैलूर क्रॉस लागसार पावली तेन्ना, पयलींच पाळत दवरून आशिल्ल्या अनवळखी इसमांनी तांची गाडी आडायली. आरोपींनी गाडयेंतल्यान तिगांकूय बळयां लागीचे एके शांत सुवातेर व्हेले. थंय तांकां व्हरून पिस्तुल आनी सुर्याचो भंय घालो. दरोडो घालप्यांनी सुरवातेक इबादुल हाचे कडल्यान १ लाख २०० रुपयांची रोख रक्कम काडून घेतली. उपरांत पयलीच आखिल्ले येवजणे प्रमाण, आरोपींनी गाडयेंत आशिल्ल्या रबीउल गाझी कडल्यान २२५ ग्रॅम वजनाचें भांगर हस्तगत केलें आनी रानाचो फायदो घेवन थंयच्यान पळ काडलो.
सुरवातेक हो गुन्यांव दरोडेखोरांचे टोळयेन केल्ल्याचो दुबाव पुलिसांक आशिल्लो. मात घडणुकेची खराय वळखून खानापूर पुलिसांनी तपास वेगान करपाक सुरवात केली. पुलिसांनी आधुनीक तंत्रज्ञान, दुबाविताचे मोबायल कॉल डिटेल्स रेकॉर्ड आनी तांचे दुबावीत हालचाली कडेन बारकायेन लक्ष दवरलें. ह्या तात्रीक तपासांत पुलिसांक प्रवासा मजगतीं गाडयेंत हाजीर आशिल्ल्या रबीउल आनी अलीहुसेन हांचेर दुबाव आयलो. तांची खोलायेन चवकशी केली तेन्ना तांणी आपल्या हेर ६ वांगड्यांचे मजगतीन हो दरोड्याचो कट रचिल्ल्याची कबुली दिली.
ह्या प्रकरणांत पुलिसांनी रबीउल गाझी, अलीहुसेन मंडल, सादिक तोरगल, विवेक पाटील, प्रशांत चव्हाण, नितीन चव्हाण, दिगंबर पाटील आनी मयूर घाडी अशा वट्ट आठ जाणांक अटक केली. बैलहोंगलचे पुलीस उपअधीक्षक हांच्या सरळ मार्गदर्शनाखाला खानापूर पुलीस पंगडान वट्ट कांय दिसांनीच ह्या गुन्यांवांवांतल्या दुबावितांक धरले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
