भांगरभूंय | प्रतिनिधी
आयपीएल 2026 फायनल आयज रॉयल चॅलेंजर्स बंगळुरू (आरसीबी) आनी गुजरात टायटन्स (जीटी) हांचे मदीं रंगतली. गुजरात टायटन्स आपल्या घरच्या मैदानाचेर खेळटलो. ह्या मैदानाचेर तांची जैताची टक्केवारी वट्ट 63% इतकी आसा. विशेस म्हणल्यार गुजरात तिसरे खेपे फायनलींत खेळटलो आनी तांच्यो तिनूय फायनली ह्याच मैदानाचेर जाल्यात.
दुसरे वटेन, आरसीबीची अंदूंची सगल्यांत व्हड ताकद म्हणल्यार तांची सांघीक कामगिरी. अंदूंच्या हंगामांत तांच्या 10 जैतांनी वट्ट 8 वेगळ्यावेगळ्या खेळगड्यांनी मॅन ऑफ द मॅच पुरस्कार मेळयल्यात. पयले क्वॉलिफायर मॅचींत आरसीबीन गुजराताक व्हड फरकान हारायिल्लो. ताका लागून ते हारीचो बदलो घेत आपलें दुसरें वस्तादपण मेळोवपाचे इत्सेन गुजरात पंगड मैदानांत देंवतलो.
मॅचीचो निकाल चड प्रमाणांत मुख्य बॅट्समन आनी बॉलरांचे वैयक्तीक लडतीचेर निंबून आसतलो.
गुजराताची भिस्त परतून एकदा राशीद खानाचेर निंबून आसतली. आरसीबीचे चडशे बॅट्समन ताच्या आड संघर्श करतात. विराट कोहलीन ताच्या आड 12 डावांनी 131 धांवड्यो केल्यात आनी तीन खेपे बाद जाला. देवदत्त पडिक्कलाचो रॅकॉर्ड लेगीत ताच्या आड तितको बरो ना. राशीदा आड ताणें णव डावांनी फक्त 40 धांवड्यो केल्यात आनी पांच खेपे बाद जाला. टीम डॅव्हिडाक लेगीत 17 मॅचींनी फक्त 70 धांवड्यो करप शक्य जाल्यात. राशीदान ताका तीन खेपे बाद केला.
आरसीबी खातीर भुवनेश्वर कुमार म्हत्वाचो बॉलर थारुये. नव्या बॉलाचेर ताची बॉलींग उत्कृश्ट पडटा. शुभमन गिल आनी जोस बटलर ताच्या आड खेळटना धडपडटना दिश्टी पडटात. गिलान ताच्या आड व्हड शाणपण चलना. 14 डावांतल्यान फक्त 80 धांवड्यो केल्यात जाल्यार भुवनेश्वरान ताका स खेपे बाद केला. बटलरान 21 डावांनी 123 धांवड्यो केल्यात. पूण, णव खेपे बाद जाला.
दुसरे वटेन गुजराताचे फास्ट बॉलर मोहम्मद सिराज आनी कगिसो रबाडा आड आरसीबीच्या बॅट्समनांचो कस लागुये. रबाडान कोहलीक पांच खेपे बाद केला. पडिक्कलाचो रॅकॉर्ड लेगीत खास ना. पडिक्कलान ताच्या आड फक्त 45 धांवड्यो केल्या आनी तीन खेपे विकेट वगडायल्या.
प्लेऑफांत जोश हेझलवुडान फक्त सात डावांनी 14 विकेटी घेतल्यात. ताची स्ट्रायक रेट लेगीत 11.6 अशी उत्कृश्ट आसा. सात प्लेऑफ डावांनी ताणें पांच खेपे दोन वा ताचे परस अदीक विकेटी घेतल्यात. ताका लागून आरसीबी ताच्या कडल्यान बऱ्या प्रदर्शनाची आस्त आसतली.
गुजराताची ओपनराची जोडी गिल आनी साई सुदर्शन हांंणी अंदूं 15 डावांतल्यान 886 धांवड्यो केल्यात. चार शेंकड्यांचो आनी दोन अर्द शेंकड्यांच्यो भागिदाऱ्यो केल्यात.
जेन्ना ही जोडी पांचवे ओव्हरी उपरांत लेगीत खेळपट्टीचेर तिगून उरल्या. तेन्ना गुजरातान सातांतल्यो स मॅची जिखल्यात. पांच ओव्हरी पयली ही जोडी फुटल्या तेन्नाचो रॅकॉर्ड चार जैतां आनी चार हारी असो आसा. ताका लागून ही जोडी फोडप आरसीबी खातीर म्हत्वाचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
