भांगरभूंय | प्रतिनिधी
पणजी : लोलये – माड्डीतळप हांगा स्वता कश्ट घेवन बांय खणून २० ते २५ घरांंक उदका पुरवण करपी बाळकृष्ण अय्या हांचो प्रधानमंत्र्यान ‘मन की बात’ कार्यावळींत उल्लेख केलो. ‘मन की बात’ कार्यावळींत ह्यान पयलींय बरें काम केल्ल्या गोंयकारांचो उल्ले जाला. लोलयेंच्या बाळकृष्ण अय्या हांंच्या कामाची प्रधानमंत्र्यांनी दखल घेवप ही गोंयकारां खातीर अभिमानाची गजाल.
मुर्ती कलेंतूय बाळकृष्ण अय्या हांणी बरें काम केलां.
१९९६ वर्सा हांवें बांय मारून घरां खातीर उदकाची वेवस्था केली. हें उदक म्हज्या घरा वांगडा आनी ५ ते ६ घरांक दिवप शक्य जाता. हेर घरांची उदकाची गरज वळखून हांवें एक किमी अंंतराचेर दुसरी बांय मारली. हांगा चड उदक लागलें. हे बांयक पंप बसोवन २० ते २५ घरांंक उदक वाटलें, अशी म्हायती बाळकृष्ण अय्या हांणी दिली.
तांंच्या कार्याविशीं अदीक म्हायती तांचे पूत हेमंंत अय्या हांणी दिली. आतां सरकारा वतीन उदकाची पुरवण जाता. सरकारच्या उदकाचो वापर बागायती खातीर करतात. घरा खावपा खातीर मात आमचेच बांयचें उदक वापरतात. बाञय खणतना बरीच समस्या निर्माण जाली. २३ फूट खोल गेले उपरांत कामगारांक ऑक्सिजन मेळना जालें. ह्या वेळार कुशीक खणून पायर्यांची वेवस्था केली. म्हजो बापूय फाटलीं ४५ वर्सां गणपतीच्यो मुर्त्यो करपाचें काम करता. तशेंच माड्डीतळप हांगच्या मारुती देवळांतली मुर्तीय बाबानीच केल्या. ‘मन की बात’ कार्यावळींत बाबांचो उल्ले के×ल्यान आमकां हाची खोस भोगता, अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
