भांगरभूंय | प्रतिनिधी
नवी दिल्ली: देशांतल्या निकतेच जल्मल्ल्या भुरग्यांचे भलायकी संबंदी एक हुस्को जावपी म्हायती मुखार आयल्या. ‘नॅशनल फॅमिली हेल्थ सर्व्हे’ (NFHS-6) च्या मुळावे आंकडेवारी प्रमाण, जल्मा उपरांतच्या पयल्या 6 म्हयन्यांत फक्त स्तनपान (Exclusive Breastfeeding) करपी मातांचें प्रमाण घटलां. हें प्रमाण 64% आशिल्लें, तें आतां 56% चेर देंवलां.
‘वर्ल्ड हेल्थ ऑर्गनायझेशन’ (WHO) आनी भुरग्यांचे भलायकी खातीर वावुरपी तज्ज्ञांच्या मतान, जल्मा उपरांतच्या पयल्या 6 म्हयन्यांत भुरग्याक फकत आवयच्या दुदाची गरज आसता. स्तनपानाक लागून भुरग्याची रोगप्रतिकारक शक्त वाडटा, दुयेंसांचो धोको उणो जाता आनी ताच्या शारीरीक तशेंच मानसीक उदरगतीक मजत जाता.
स्तनपान घटपाचीं कारणां
तज्ज्ञांच्या मतान, शारीकरण, कामाचेर वचपी आवयांची वाडटी संख्या, कृत्रीम दुदाचो आनी हेर खाद्यांचो वापर हाका लागून स्तनपानाचें प्रमाण उणें जालां. तशेंच, कांय कडेन जागृतायेचो अभाव आनी कुटुंबा कडल्यान योग्य मार्गदर्शन मेळप ना, हींय मुखेल कारणां आसात.
भलायकी तज्ज्ञांनी हे परिस्थितीचेर हुस्को उक्तायला. केंद्र आनी राज्य सरकारांनी जनजागृती मोहीम आनीक प्रभावीपणान चालीक लावपाची गरज तांणी उक्तायल्या. नव्या आवयांचें समुपदेशन (Counseling), स्तनपाना विशीं प्रशिक्षण आनी कामाच्या थळांचेर सोयी- सुविधा उपलब्ध करून दिल्यार हें प्रमाण परत वाडूंक शकता, अशें मत तज्ज्ञांनी उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
