भांगरभूंय | प्रतिनिधी
मडगांवः काँग्रेस पक्ष कोणाच्याच बापायचो न्हय. हो पक्ष सगल्या कार्यकर्त्यांचो. म्हाका कितें दिसता हाचो कसलोच फरक पडना. पक्षाच्या हायकमांडान घेतिल्लो निर्णय काँग्रेस कार्यकर्ता म्हणून स्विकारप गरजेचें आशिल्ल्यान पक्षाच्या हिता खातीर हांवें तो स्विकारला. फुडल्या दिसांनी पक्ष घटमूट करपा खातीर काम करतलों अशें आदले खासदार फ्रांन्सीस सार्दीन हांणी सांगलें.
काँग्रेस पक्षांतल्या अध्यक्ष बदलाच्या भितरल्या घडामोडीं विशीं उलयतना सार्दीन हांणी सांगलें, कोणाक अध्यक्ष म्हणून नेमपाचो हो अधिकार पक्षाच्या केंद्रीय वरिश्ठ फुडार्यां कडेन आसता. तो आदेश म्हाका आवडटलो वा ना, तरी तो पक्षाची शिस्त म्हणून मान्य करप गरजेचें. हाचे आदीं पक्ष अध्यक्ष म्हणून नेमणूक जाली तेन्ना आदीं सल्लामसलत जावंक नाशिल्ली आनी आतां लेगीत नव्या बदलां विशीं चर्चा जावंक ना. पूण पक्ष खंयच्याच एका मनशाचो नाशिल्ल्यान तो सगळ्यांचो आनी पक्षाची संघटना घटमूट जावची अशी आमची प्रामाणीक इत्सा आसा.
प्रदेश काँग्रेसच्या नवे समितींत समन्वय समितीच्या अध्यक्षपदार सार्दिन हांची नेमणूक केल्या.
हाचेर उलयतना तांणी सांगलें, हें पद मेळळ्ळां हे विशीं म्हाका म्हायती मेळ्ळ्या, तरी ह्या कामाचें नेमकें स्वरूप कितें आसतलें हें बेगीनूच स्पश्ट जातलें; सध्या ताचे विशीं सविस्तर म्हायती ना. हें पद दिवचे पयलीं म्हजे कडेन कसलीच चर्चा जावंक ना. पूण ही व्हडली जापसालदारकी फकत काँग्रेस पक्षाक कोण कितें करूंक शकता हाची पुराय जाणविकाय वरिश्ठांक आशिल्ल्यानच म्हजेर सोंपयल्या. देखून दिल्लें पद मान्य करून काँग्रेस पक्षाक बळगें दिवपा खातीर पुराय बळग्यान वावुरतलों.
पक्षांत समन्वय साधतना आपल्याक अध्यक्षांच्या कसल्याच पुर्वपरवानगेची गरजे पडची ना, अशें सांगून सार्दीन हांणी मुखार म्हणलें, आमकां आवडूं वा ना आवडूं तरी गिरीश चोडणकार हांकां पक्षान अध्यक्ष केलो. हाका लागून तांचो आदर करप आनी तो निर्णय स्विकारप दरेका काँग्रेस कार्यकर्त्याचें कर्तव्य. पक्षांत फकत ’हय हय’ म्हणपी बैल न्हय, लोकशाय मार्गान सगल्या कार्यकर्त्यांच्या मताक किंमत दितले.
ह्यान पयलीं आपूण खासदार पदाचेर कार्यरत आशिल्ल्यान पक्षाच्या भितरल्या निर्णयांचेर उक्तेपणान भाशण करपाक मेळनाशिल्लें, मात आतां पक्षाच्या हिता खातीर आमी आमचे विचार ठामपणान मांडटले. काँग्रेसी खातीर कितें बरें आनी कितें वायट, तशेंच वेंचणुको कश्यो जिखतले, हाचो अणभव ज्येष्ठ फुडारी म्हणून आसा. येवपी वेंचणुकेंत काँग्रेस कितल्यो सुवातो जिखतलें, हें फकत निकाला दिसा मतमेजणे उपरांत समजतलें, अशें सांगून सार्दीन हांणी सुवातांचो आंकडो सांगूंक ना. सध्या भाजप राज्यांत बरे स्थितींत आसा काय ना, हें येवपी काळून थारायतलो. आमी फकत काँग्रेस पक्षाच्या जैता खातीर काम करीत रावतले, अशें सांगून तांणी वेंचणुकेच्या तीन म्हयन्यां आदीं राजकीय स्थितीचेर सविस्तर भाशण करपाचें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
