भांगरभूंय | प्रतिनिधी
म्हापशें: मानशेर, रेवोड्यां गव्याच्या हल्ल्यांत सिंथिया फर्नांडीस (४५) ही बायल गंभीर जखमी जाली. जखमीचेर म्हापशें जिल्लो हॉस्पिटलांत उपचार सुरू आसात.
ही घडणूक आयज सकाळीं सुमार ७.३० वरांचेर घडली. जखमी सिंथिया आपल्या पोशिल्ल्या सुण्याक सदां भशेन घरा भायर व्हरताली. तेन्ना फाटल्यान अचकीत तिचेर गव्या रेड्यान येवन हल्लो केलो.
तिचे फाटीचेर शिंग मारिनाफुडें ती सकयल कोसळ्ळी. सुण्यान नेटान भोंकपाक सुरवात करताची जखमीच्या घरचीं सगलीं भायर धांवून आयलीं. तांणी गव्याक थंयच्यान धांवडायलो.
उपरांत सिंथिया हांकां तिच्या कुटुंबियांनी रोखडीच म्हापशें जिल्लो हॉस्पिटलांत दाखल केली. गव्याचें शींग लागिल्ल्यान तिचे फाटीक गंभीर दुखापत जाल्या. तशेंच हल्ल्या उपरांत रस्त्यार कोसळिल्ल्यान तिच्या पांयांकूय जखम जाल्या. जखमीचेर जिल्लो हॉस्पिटलांत उपचार सुरू आसात.
रानां सोंपिल्ल्यान रानवटी जनावरांक लोकवस्तींत येवचें पडटा. हाका लागून सगल्या जनावरां कडल्यान हल्ले जातात. आपले आवयचेरूय अश्याच रानवटी जनावरान हल्लो केला. मात ती देवाचे कृपेन वाटवली. सरकारान असल्या रानवटी जनावरांचेर तीं लोकवस्तींत येवचीं न्हय म्हूण कितेंय उपाय करचे, अशी मागणी हेडन फर्नांडीस हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
