भांगरभूंय | प्रतिनिधी
पणजी : कांपाल, मिलिटरी हॉस्पिटला लागसार इनर लेन रस्त्यार २८ मेक सकाळीं जाल्ल्या गाडी आनी दुचाकी अपघातांत गंभीर जखमी दुचाकी चालक संगीतकार फाउस्तो रॉड्रिग्ज (६०, रा. मिरामार) हांकां उपचारा वेळार मरण आयलें. ह्या अपघातांत तांची बायल मारिया रॉड्रिग्ज (५५) ह्योय गंभीर जखमी जाल्यात. तांचेर हॉस्पिटलांत उपचार सुरू आसात. ह्या प्रकरणांत निश्काळजीपणां आनी धोको निर्माण करून गाडी चलयिल्ले खातीर पणजी पुलिसांनी ७६ वर्सां पिरायेच्या गाडी चालकाचेर गुन्यांव दाखल केला.
पुलिसां कडल्यान मेळिल्ले म्हायती प्रमाण, हो अपघात बिरेस्तारा सकाळीं सुमार १०:४३ वरांचेर कांपालच्या पिंटो हावस जंक्शना लागसार घडलो. दुबावीत गाडी चालक फ्रान्सिस्को झेवियर एन. सांताना फर्नांडीस (७६, सांतीनेझ, पणजी) हो आपली ह्युंडाय क्रेटा कार घेवन भलायकी संचालनालयाच्या फाटल्या रस्त्यावेल्यान डॉ. ब्रागांझा परेरा रस्त्याचे दिकेन वतालो. गाडी चलयतना तांणी वेगाचेर नियंत्र दवरिनासतना निश्काळजीपणान गाडी चलोवन मुखारच्यान वचपी सुझुकी क्सेस स्कुटरीक दावे वटेन नेटान धपको दिलो. हो धपको बरोच नेटान बसलो. हातूंत दुचाकीवेलें जोडपें रस्त्याचेर पडलें आनी तांकां गंभीर दुखापत जाली.
ह्या अपघाताची म्हायती मेळटांच पणजी पुलीस स्टेशनाचे हवालदार समीर नायक आनी तांच्या पंगडान बेगोबेग घडणुके सुवातेर वचून जखमींक हॉस्पिटलांत दाखल केले. पणजी पुलिसांनी हवालदार समीर नायक हांचे कागाळीवेल्यान दुबावीत गाडी चालक फ्रान्सिस्को फर्नांडिसा आड बीएनएसच्या संबंदीत कलमा प्रमाण गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
