भांगरभूंय | प्रतिनिधी
फोंडें: ओकांब- धारबांदोड्यां दुदसागर न्हंयेंत आयतारा सांजवेळा आपल्या इश्टां सयत न्हावपाक गेल्ल्या इम्तियाज हुसेन (21, लडाख) हो तरणाटो बुडलो. उदकांत बुडिल्लो इम्तियाज हुसेन हो फर्मागुडयेर आयआयटीचो विद्यार्थी आशिल्लो. घडणुकेची म्हायती मेळ्ळे उपरांत फोंडें पुलीस आनी उजो पालोवपी दळाच्या कर्मचाऱ्यांनी घडणूक थळार धांव घेवन बेपत्ता जाल्ल्या तरणाट्याचो सोद घेतलो. पूण रात जाल्ल्यान सोद कार्य बंद केलें आनी आयज (सोमारा) सकाळीं परतून सोद घेतले.
मेळिल्ले म्हायती प्रमाण आयतारा दनपारां 8 विद्यार्थ्यांचो गट न्हंयचेर न्हावपा खातीर आयिल्लो. ह्या वेळार सगले जाण न्हाता आसतनाच उदकाचो अदमास येवंक नाशिल्ल्यान इम्तियाज हुसेन हो विद्यार्थी बुडलो. न्हावपा खातीर गेल्ल्या हेर विद्यार्थ्यांनी रोखडेंच फोंडें पुलीस आनी उजो पालोवपी दळाच्या कर्मचाऱ्यांक फोना वेल्यान म्हायती दिली.
घडणुकेची म्हायती मेळ्ळे उपरांत फोंडें पुलीस स्टेशनाचे निरिक्षक मोहन गावडे आनी हेर कर्मचाऱ्यांनी घडणूक थळार धांव घेतली. तशेंच उजो पालोवपी दळाच्या कर्मचाऱ्यांनी धांव घेवन सोद मोहीम सुरू केली. पूण काळोख जाल्ल्यान सोद मोहीम बंद केली.
गोंयांत गरमेचो पारो वाडिल्ल्यान व्हड संख्येन लोक न्हंयचेर न्हावपा खातीर येतात. थळावे लोक आनी पुलीस धांवडावन घालीत आसले तरी न्हावपा खातीर येवपी लोक सेगीत वाद घालत आशिल्ल्याचो प्रकार घडत आसता. स्वता जीव घाताक घालून थळाव्या लोकांक उरफाट्यो जापो दिवपाचे प्रकार हाचे पयली घडिल्लो.
थळावे पंचायतीन लेगीत हाचे पयलीं न्हावपा खातीर येवपी लोकां मदीं जागृताय करपा खातीर विवीध सुवातांनी बॅनर्स लायिल्ले. तशेंच दक्षीण गोंयच्या जिल्होधिकाऱ्यांच्या आदेशा प्रमाण लेगीत न्हंयचे धडेर विवीध सुवातांनी बॅनर्स लायल्यात.
दक्षीण गोंयच्या जिल्होधिकाऱ्यांनी हाचे पयलींच न्हंयेंत न्हावपा खातीर बंदीचो आदेश दिल्लो. पूण जिल्होधिकाऱ्याच्या आदेशाक पाळो दिनासतना हेर वाठारांतले लोक व्हड संख्येन न्हंयचेर न्हावपा खातीर येतात. ताका लागून आदेशाक पाळो न दिवप्यां आड कारवाय करपाची सामकी गरज आशिल्ल्याची चर्चा थळावे लोक करीत आसात.
दक्षीण गोंयच्या जिल्होधिकाऱ्यांनी हाचे पयलीं न्हंयचेर न्हावपा खातीर बंदी लागू करपाचो आदेश दिल्लो. पूण जिल्होधिकाऱ्यांच्या आदेशाक पाळो दिनात तांचेर कारवाय कोण करतलो? असो प्रस्न सद्या थळावे लोक उपस्थीत करीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
