भांगरभूंय | प्रतिनिधी
पणजी : ओकांब-धारबांदोडचे दुधसागर न्हंयेंत आयतारा सांजेवेळार पेंवपा खातीर गेल्ल्या इम्तियाज हुसेन (२१, मूळ लडाख) हो तरणाटो उदकाचो अदमास चुकिल्ल्यान बुडलो. आजूनय तो मेळूंक ना. ताची सोद मोहीम चालू आसा. इम्तियाज हो फोंडें-फर्मागुडयेवेलो आयआयटीचो विद्यार्थी आशिल्लो. आयतारा तो आपल्या सात इश्टां वांगडा न्हंयेचेर न्हांवपाक गेल्लो.
हे विशीं चड म्हायती प्रमाण, आयतारा आठ विद्यार्थ्यांचो पंगड दुधसागर न्हंयेंत न्हांवपा खातीर देंवले. उदकाचो अदमास चुकिल्ल्यान इम्तियाज उदकाच्या प्रवाहांत ओडत गेलो आनी बुडलो. ताच्या वांगडा आशिल्ल्या इश्टांनी रोखडोच फोंडें पुलीस आनी उजो पालोवपी दळाक हे विशीं म्हायती दिली. फोंडें पुलीस निरीक्षक मोहन गावडे आनी तांचो पंगड घडणुके सुवातेर पावलो. उजो पालोवपी दळाच्या जवानांनी रातच्या उसरां मेरेन सोद मोहीम राबयली, मात काळखाक लागून ही सोद मोहीम बंद उडोवची पडली. आयज, सोमारा सकाळीं परत आपत्कालीन सेवा दळाचे मजतीन सोद मोहीम झुजा पांवड्यार सुरू केली.
मजगतीं, हे घडणुकेक लागून प्रशासकीय आदेशांच्या अंमलबजावणीचेर प्रस्न उप्रासला. राज्यांतल्यो न्हंयो, कालवे आनी घडघश्यांचेर वाडपी बुडपाच्यो घडणुको लक्षांत घेवन जिल्लोधिकार्यांनी अशे सुवातेर न्हांवपा खातीर वचपाक बंदी घातल्या. मात ह्या आदेशा कडेन आड नदर केल्ल्यान नागरिकांनी तिडक उक्तायल्या. अशे सुवातेर खर बंदोबस्त दवरून आदेश मोडप्यांचेर खर कारवाय जावची. अशें केल्यारूच हांगा येवपी पर्यटकांचो जीव वाटवतलो, अशी मागणी थळाव्यांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
