भांगरभूंय | प्रतिनिधी
भांगराची खरेदी करूं नाकात
नरेंद्र मोदी हांचें लोकांक आवाहन
हैदराबाद: मध्यपूर्वेतल्या झुजाचे फाटभुंयेर पेत्रोल-डिझल दरवाडीची शक्यताय लक्षांत घेवन ‘वर्क फ्रॉम होम’ सुरू करात. इंधनाची बचत करात आनी परकी चलन वाटावपा खातीर वर्सभर भांगराची खरेदी टाळात अशें आवाहन प्रधानमंत्री नरेंद्र मोदी हांणी देशांतल्या लोकांक केलें.
अस्तंत आशियांत सुरू आशिल्ल्या झुजाचे फाटभुंयेर प्रधानमंत्री नरेंद्र मोदी हांणी काल (आयतारा) देशांतल्या लोकांक पेत्रोलियम उत्पादनांचो वापर संयमान करपाचें आवाहन केलें. तेलंगणांत सुमार 9,400 कोटी रुपयांच्या विकासकामांचें उक्तावण करतना प्रधानमंत्र्यांनी इंधनाचे बचतीचेर भर दिलो. भारत व्हड प्रमाणांत इंधन आयात करीत आशिल्ल्यान सद्याचे परिस्थिती संयम पाळप ही काळाची गरज आशिल्ल्याचें तांणी स्पश्ट केले. सद्या ते दक्षीण भारत भोंवडेर आसात.
तेलंगणांतल्या प्रकल्पांचो शुभारंभ करतना प्रधानमंत्र्यांनी म्हणलें, भारत आयज ‘रिफॉर्म्स एक्सप्रेसी’चेर स्वार जावन आधुनीक मुळाव्या सुविधांची निर्मिती करीत आसा. हातूंत हैदराबाद-पणजी इकॉनॉमीक कॉरिडॉरा वेली गुडेबेलूर ते महबूबनगर (एनएच-167) ह्या मार्गाचें चौपदरीकरण, संगारेड्डी जिल्ह्यांतल्या जहीराबाद उद्देगीक क्षेत्राचो विकास काझीपेठ-विजयवाडा रेल्वे मल्टी ट्रॅकिंग प्रकल्पाचे कांय टप्पे आनी काझीपेठ रेल्वे बायपास. हैदराबादातल्या ग्रीनफिल्ड पेट्रोलियम, ऑयल अॅण्ड ल्युब्रिकंट्स (पीओएल) टर्मिनल आदींचो आस्पाव आशिल्ल्याचेंय तांणी सांगलें.
सुमार 1,700 रुपया खर्च करून उबारिल्ल्या वारंगल हांगासरल्या ‘पीएम मित्रा पार्क’ (काकतीय मेगा टेक्सटायल पार्क) हें देशांतलें पयलें पुर्णताय कार्यान्वीत पार्क आसा. केंद्र सरकाराच्या 5एफ व्हिजन खाला हें पार्क कापड उद्देगाक घटाय दिवपा खातीर आनी निर्यातीक चालना दिवपा खातीर तयार केलां.
सरकाराच्या भोवआयामी ऊर्जा धोरणाचेर उलयतना मोदी हांणी म्हणलें, सरकारान दरेक घरा मेरेन एलपीजी पावोवपाचेर लक्ष केंद्रीत केलां आनी आतां सवाय ‘पायप्ड गॅस’ (पीएनजी) पुरवण वाडोवपाचेर लक्ष दितात. तशेंच सीएनजी आदारीत इकोसिस्टमाकूय केंद्र सरकार सक्रीयपणान प्रोत्साहन दीत आसा.
पेत्रोलियम उत्पादनां गरजे प्रमाण वापरचीं
आयज पेत्रोल गॅस आनी डिझल ह्या साक्या गजालींचो सामक्या संयमान वापर करप ही काळाची गरज आसा. आमकां आयात केेल्ली पेत्रोलियम उत्पादनां फक्त गरजे प्रमाणूच वापरचीं पडटलीं. हाका लागून फक्त परकी चलनच वाटावचें ना, जाल्यार झुजाच्या प्रतिकूल परिणामांचीय खरताय उणी जातली अशें प्रधानमंत्री नरेंद्र मोदी हांणी म्हणलें.
—
काँग्रेसीन द्रमुकाचे फाटींत तोपलो सुरो
सद्या तामिळनाडूतली परिस्थिती पळयात. 25-30 वर्सां काँग्रेसीचे द्रमुका कडेन बरे संंबंद आशिल्ले. वेळावेळार द्रमुका बराबरचे युतीन काँग्रेसीक संकश्टांतल्यान भायर काडला. 2014 पयलीं 10 वर्सां काँग्रेसीच्या फुडारा खालचें सरकार व्हड प्रमाणांत द्रमुकाक लागूनच तिगून उरलें. तरी लेगीत जी द्रमुक काँग्रेसीच्या बर्या खातीर सेगीत काम करताली, त्याच पक्षाक राजकी वारें बदलतकच काँग्रेसीन दगो दिलो. सत्तेचे आशेन काँग्रेसीन पयलेच संदीत द्रमुकाचे फाटीत सुरो तोपलो. आतां राजकी नदरेन तिगून उरपा खातीर काँग्रेसीक आनीक एका पक्षाची गरज आसा. जाचे फाटीर स्वार जावन ती मुखार वचूंक शकतली अशें प्रधानमंत्री नरेंद्र मोदी हांणी म्हणलें. ते कर्नाटकांतले एके कार्यावळीत उलयताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
