भांगरभूंय | प्रतिनिधी
डीएनए, फॉरेन्सीक अहवाल 15 दिसांत मेळटलो
पणजी: वागाचें पोट आनी यकृत मेळूंक नाशिल्ल्या कारणान डीएनए तशेंच फॉरेन्सीक चांचणी अहवालाक आडखळी येतल्यो. हाचे खातीर वागाचे आनीक अवयव सोदपाचो वावर सुरू आसा. रानां खात्याच्या अधिकाऱ्या कडल्यान ही म्हायती मेळ्ळी.
सांकोड्डें रानांत फाटल्या सप्तकांत 2 मेयाक वागाचो सांगाडो मेळ्ळो. चांबडें, नखटां, शेंपडी हे अवयव मेळ्ळ्यात. मात ताचे पोट आनी यकृत (लीवर) मेळूंक ना. मरणा उपरांत तीन सप्तकांनी सांगाडो मेळ्ळो. पोट आनी यकृत कुसून नश्ट जाले काय हेर प्राणी वा पक्षांनी व्हेलें? हो प्रस्न आसा. चांबडें आनी शेंपडी उरली म्हणजे पोट आनी पोटांतले काय अवयव उरपाक जाय आसले. मात ते अजून मेळूंक नात. जीर्ण जावन वाऱ्यार हुबून वचपाची शक्यताय न्हयकारपाक येना. चडांत चड अवयवांची चांचणी जायत तितलो मरणाचो निश्कर्श काडप सोंपें जातलें. वीख प्रयोग जावंक ना, असो मुळावो अदमास आसा. मात पोट वा यकृत मेळ्ळें जाल्यार ताची चांचणी जावन विखा विशीं 100 टक्के निश्कर्श काडप शक्य आशिल्लें. जे किदें अवयव मेळ्ळ्या ताच्या आदारान डीएनए आनी फॉरेन्सीक चांचणी करून आतां निश्कर्श काडचो पडटलो, अशें अधिकाऱ्यान सांगलें.
सांकोड्डें रानांंत वागाचो जो सांगाडो मेळ्ळो त्या वागाची कास जावंंक ना, अशें स्पश्ट जालां.
वागाची पिराय जाल्ल्यान ताका सैमीक मरण आयिल्ल्याचो मुळावो अदमास आसा. सगले अवयव मेळ्ळे जाल्यार दुयेंसाक लागून वा आताकान मरण आयलें, ताचें कारण कळप शक्य जातलें आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
