भांगरभूंय | प्रतिनिधी
गोंयांत चार- पांच धरणां आसून लेगीत दर वर्सा कांय गांवांनी उदकाची टंचाय जाणवता. ही आतां एका वर्साची न्हय, तर दर वर्साचीच काणी जाल्या. एक वटेन कर्नाटक म्हादय न्हंयचें उदक वयर व्हरपाचो यत्न करता, अशा वेळार आमी एक तर उदक सांठोवपाक शिकूंक जाय ना जाल्यार उदक सोदपाची आमची परंपरीक पद्धत चालीक लावंक जाय.
तुमकां जमीन पोखरीनासतना शास्त्रीय नदरेन उदक सोदपाची कला शिकपाची आसत, तर रत्नागिरींत 16 मे दिसा एक दिसाची खाशेली कार्यशाळा जातली. 18 वर्सां वयर कोणाकूय ह्या शिबिरांत वांटो घेवंक येता. ‘चैतन्य ज्योतिष मंडळा’ वतीन घडोवन हाडिल्ल्या ह्या शिबिराची फी 3500 रुपया आसा.
आज उदक ही मनशाची सगळ्यांत व्हडली गरज जाल्या. पुर्विल्ल्या
काळांत घरा घरांनी बांयो आशिल्ल्यो, पूण आतां त्यो पुरोवन लोक फकत
नळाच्या उदकाचेर अवलंबून आसात. ताका लागून कोणाक उदकाचो उणो दाब सोंसचो पडटा, तर कोणाक उदक उण्या वेळार मेळटा. अशा वेळार आपल्याच सुवातेर उदकाचो स्रोत सोदप गरजेचें जालां.
कार्यशाळेचें स्वरूप आनी तज्ञ
सरकारची ‘उदक आडायात, उदक जिरयात’ ही मोहीम आसाच, पूण शास्त्रीय जोड दिवन उदक सोदप हें चड फायद्याचें थारता. ह्या क्षेत्रांतले तज्ञ दोतोर प्रसन्न मुळ्ये हे स्वता ही कार्यशाळा घेतले.
तांच्या वांगडा सुप्रिया भारवाडकर ह्यो लेगीत म्हायती दितल्यो. दोतोर मुळ्ये हांणी आतां मेरेन 200 वयर विद्यार्थी तयार केल्यात,
जे भूजल शोधक म्हणून काम करतात. तांच्या कडे ज्योतिष, कृष्णमूर्ती विशारद आनी वास्तू विशारद अशा जायत्या विशयांचो अभ्यास आसा.
कसो घेवप उदकाचो सोद?
आमचे पृथ्वीर उदक खंय आसा हें सोदपाची एक कला आसा. हातांत ‘नाल्ल’ धरून उदक सोदपाची पद्दत दोतोर मुळ्ये प्रात्यक्षिका सयत शिकयतले. नालाच्या सुवातेर उदकाची बाटली वा तांब्याचो वापर करूनय हें काम कशें करूं येता, हाची म्हायती थंय मेळटली.
उदक: फुडल्या झुजाचें कारण?
सद्या अमेरिका, इझ्रायल आनी
इराण हांच्यातल्या तणावाक लागून तेलाचेर आनी गॅसाचेर परिणाम
जाला. तेलाक आमी पर्याय सोदूंक शकतात, पूण उदकाक पर्याय ना. लोक म्हणतात तशें फुडलें महायुद्ध उदका खातीर जावपाची शक्यताय नाकारूंक येना. देखून मेळटा थंय बोअरवेल्स मारपा परस योग्य सुवातेर उदक सोदप म्हत्वाचें. एक वेळ तेल मेळपाक शकता, पूण रक्त आनी उदक मेळत हाची खात्री ना. ते खातीर आमकां एकमेकांची मजत घेवचीच पडटली.
महात्मा गांधी म्हणटाले, “पृथ्वी आमच्यो गरजो (Need) भागोवंक शकता, पूण मनशाची हाव (Greed) न्हय.” गरजो आनी हाव हांतलो फरक वळखून आमी उदकाचो वापर करपाक जाय.
चैतन्य ज्योतिष मंडळ ही संस्था 2008 सावन कार्यरत आसा आनी तिका सरकारी मान्यताय आसा. ज्योतिष आनी हेर विशयांचेर ही संस्था सतत कार्यशाळा आनी संमेलनां घेता. ज्या लोकांक आपल्या वाठारांत उदकाचो प्रस्न आसा अशें दिसता, तांणी रत्नागिरी जावपी हे कार्यशाळेचो लाभ घेवचो.
संपर्क क्रमांक आसात, डाॅ. प्रसन्न मुळ्ये 9405954729 आनी सुप्रिया भारवाडकर 9833366265
वतां वतां
गोंय विद्यापिठान नव्या शैक्षणिक वर्सा खातीर अर्ज मागयल्यात. ‘लाईफ सायन्स’ (M.Sc.) आनी हेर अभ्यासक्रमां खातीर जे विद्यार्थी उत्सुक आसात, तांणी विद्यापिठाच्या संकेतथळाचेर वचून म्हायती घेवची.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
