भांगरभूंय | प्रतिनिधी
एकल्याक ताब्यांत घेवपाक येस, दुसऱ्याचो सोद सुरू
पणजी: मेरशे हांगा आशिल्ल्या ‘अपना घर’ ह्या सरकारी पुनर्वसन केंद्रांतल्यान परतून एकदां दोन नेण्ट्यां भुरग्यांनी पळ काडपाची धक्को दिवपी घडणूक मुखार आयल्या. आयतारा सकाळीं ह्या भुरग्यांनी केंद्राच्या कर्मचाऱ्यांक आनी सुरक्षा यंत्रणेक चकवो दिवन पळ काडलो. पोरणें गोंय पुलिसांनी ह्या भुरग्यांचो सोद घेवपा खातीर विशेश पंगड तैनात केल्यात.
मेळिल्ले म्हायती प्रमाण पळून गेल्लीं ही दोन भुरगीं किरकोळ गुन्यांवांनी वांटेकार आशिल्ल्यान तांकां ह्या केंद्रांत दवरिल्ले. केंद्रांतल्या कर्मचाऱ्यांक ही गजाल लक्षांत येतकच तांणी रोखडेंच पुलिसांक आपयलें.
पोरणें गोंय पुलीस आनी केंद्रांतल्या कर्मचाऱ्यांनी आशिकुशीच्या वाठारांनी सोदमोहीम राबयली. ह्या वेळार पळून गेल्ल्या दोगां मदल्या एकल्याचो सोद लागलो. ह्य 15 वर्सा पिरायेच्या भुरग्याक परतून अपना घरांत धाडून दिलो. हेर एकल्याचो सोद सुरू आसा.
अपना घरांतल्यान भुरग्यांनी पळून वचपाची ही पयलीच फावट न्हय. फाटल्या कांय वर्सांतल्या आंकडेवारीचेर नदर मारीत जाल्यार ह्या केंद्रांतल्यान पळ काडपाचे सत्र सेगीत सुरू आशिल्ल्याचें दिसता. 2010 वर्सा पांच भुरगीं पळून गेल्लीं. जाल्यार 2020 फेब्रुवारी म्हयन्यांत एकाच वेळार स भुरगीं बेडशिटाच्या आदारान जनेलांतल्यान देंवून पळून गेल्लीं. फाटल्या कांय वर्सांत म्हणल्यार 2023 वर्साय अशेच तरेन जनेलाचे ग्रिल्स तोडून भुरग्यांनी पळ काडिल्लो.
सेगीत घडपी ह्या घडणुकां फाटल्यान खूबशीं कारणां आसात. खूबशे फावटी केंद्रांतली शिस्त, सोयीसुविधांचो उणाव वा घराची ओड हाका लागून भुरगीं पळ काडपाचो यत्न करतात. कांय प्रकरणांनी भुरग्यांनी सुरक्षा रक्षकांकूच कुडींत बंद दवरिल्ल्याचें मुखार आयिल्लें. भुरगीं हांगासरल्यान पळून रेल्वेन मुंबय वा हेर राज्यांनी वचपाचो यत्न करतात. हें लक्षांत घेवन पुलिसांनी करमळी आनी हेर रेल्वे स्टेशनांचेर पाळो दवरला.
ह्या पुनर्वसन केंद्राची निर्मिती भुरग्यांच्या सुदारणे खातीर केल्ली आसली तरी सेगीत जावपी हे घडणुकेक लागून केंद्राच्या प्रशासकी आनी सुरक्षा वेवस्थेतल्यो त्रुटी उक्तडार येत आसात. सुरक्षा रक्षकांचो उणाव, सीसीटीव्ही कॅमेऱ्यांची अनुप्लब्धताय वा भुरग्यांचें योग्य तरेन समुपदेशन न जावप ही हाचे फाटलीं मुखेल कारणां आशिल्ल्याचें तज्ञांचें मत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
