भांगरभूंय | प्रतिनिधी
पांच जाणां आड गुन्यांव दाखल
म्हापशें: कळंगूटे रोडरेजी वेल्यान दोन गटांत मारपेट जाली. हे मारपेटींत कागाळदार गटांतले स जाण जखमी जाले. जाल्यार पांच जाणांचो दुबावीत गट फरार जाला. ह्या प्रकरणांत पुलिसांनी गुन्यांव दाखल केला आनी करंजाळे- तिसवाडी हांगासरल्या दुबावीत गटाची वळख पटयल्या.
ही घडणूक सोमारा फांतोडेर 5 वरांच्या सुमाराक कळंगूट बागा सर्कल जंक्शना कुशीक त्रिपाठी वायन स्टोरा मुखार घडली. कागाळदार गौरेश वेर्णेंकार (19, रा. दिवचल) आनी तांचे पांच इश्ट मेळून स जाणांचो गट जीए 04 एच 1045 क्रमांकाचे हुंदाय व्हेन्यू मोटारीन कळंगूटे सावन बागाचे दिशेन वताले. जाल्यार पांच जाणांचो दुबावीत आरोपींचो गट जीए 06 डी 5652 क्रमांकाचे मारुती रिट्झ मोटारीन तेच दिशेन वताले.
दुबावीत आरोपींनी कागाळदार गटाक घडणूक थळार मोटार आडवी घालून आडायली आनी आपले मोटारीक सायड कित्याक दिली ना हे विशींची जाप विचारली. तशेंच गाळी संवून जिवेशी मारपाची धमकी दिली.
मुखार वाहनां आशिल्ल्यान सायड दिवप शक्य जावंक नाशिल्ल्याचें सांगून लेगीत दुबावितांनी कागाळदार आनी तांच्या इश्टांक हातांनी, पांयांनी येथिश्ट मारपेट केली. तशेंच कागाळदार वेर्णेंकार हांचे मोटारीची तोडफोड केली आनी उपरांत दुबावीत आरोपींनी आपले मोटारी सयत घडणूक थळा वेल्यान पळ काडली. जखमींचेर कांदोळे भलायकी केंद्रांत उपचार केले.
पुलिसांनी ह्या प्रकरणांत दुबावीत आरोपीं आड भारतीय न्याय संहितेच्या (126(2), 352, 351(3), 115(2), 324(3) आनी 3(5) कलमा खाला गुन्यांव दाखल केला.
मजगतीं, पुलिसांनी फरार दुबावीत आरोपी गटाची वळख पटयल्या आनी हो गट करंजाळचो आसा. फुडलो तपास पुलीस निरिक्षक लक्षी आमोणकार हांच्या मार्गदर्शना खाला उपनिरिक्षक विश्वजीत ढवळीकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
