भांगरभूंय | प्रतिनिधी
खबरां संस्था
मुंबय : देशांतल्या पांच राज्यांतल्या सात विधानसभा सुवातां खातीर घेतिल्ल्या पोटवेंचणुकांचे निकाल जाहीर केल्यात. महाराष्ट्रांतल्या बारामती मतदारसंघांतल्यान राष्ट्रवादी काँग्रेसीची उमेदवार सुनेत्रा पवार हांणी 2,18,000 परस अदीक फरकान इतिहासीक जैत नोंद केलां. हो मतांचो फरक भारताच्या इतिहासांतलो आतां मेरेनचो सगल्यांत व्हड फरक थारला.
बारामती हो सुनेत्रा हांचो घरकार अजीत पवार हांचो परंपरीक बालेकिल्लो आसा. हे वेंचणुकेंत तांकां 22 अपक्ष उमेदवारांक फुडो करचो पडलो. महाराष्ट्रांतल्या राहुरी मतदारसंघांतल्यान भाजपाचे अक्षय कार्डीले जिखल्यात. भाजपान गुजरात, नागालॅण्ड आनी त्रिपुरा ह्या राज्यांनी दरेकी एके सुवातेचेर जैत मेळयलां. कर्नाटकांत काँग्रेसीच्या उमेदवारांनी बागलकोट आनी दावणगेरे दक्षीण ह्या सुवातांचेर जैत मेळयलां. हे पोटवेंचणुकेंत लडयल्ल्यो सातूय सुवातो, संबंदीत सध्याचे आमदार भायर पडिल्ल्यान रित्यो जाल्ल्यो. कर्नाटक, नागालॅण्ड आनी त्रिपुरा ह्या राज्यांनी 9 एप्रीलाक मतदान जालें. गुजरातांत लिमखेडा सुवाते खातीर तशेंच महाराष्ट्रांतल्या बारामती आनी राहुरी ह्या सुवातां खातीर 23 एप्रीलाक मतदान जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
