भांगरभूंय | प्रतिनिधी
भाजपाक 166 सुवातांचेर जैत
टीएमसीन जिखल्यो 59 सुवातो
काँग्रेसीक फकत दोन सुवातो
खबरां संस्था
कोलकाता, नवी दिल्ली : बंगालांतल्या 294 सुवातांतल्यो भाजपान 166 सुवातो जिखल्यात आनी 42 सुवातांचेर आघाडी घेतल्या. टीएमसीन 59 सुवातो जिखल्यात आनी 20 सुवातांचेर आघाडी घेतल्या. काँग्रेसीन फकत दोन सुवातो जिखल्यात. उणें मतदान जाल्ले एके सुवातेचेर 21 मेक फेरमतदान जातलें. भवानीपूरांत सुवेंदू हांणी ममता बॅनर्जी हांकां 15,114 मतांनी हारयली. ममता बॅनर्जी हांणी मतमेजणी केंद्राचेर सुमार 5 वरां सारलीं. भायर आयले उपरांत आपल्याक भितर धुकलून मारबडय केल्ल्याचो आरोप तांणी केलो. तशेंच फेरमतमेजणीची मागणी केली.
अस्तंत बंगाल, तामिळनाडू, केरळ, आसाम आनी पुदुच्चेरींत विधानसभा वेंचणुकांचे निकाल आयल्यात. अस्तंत बंगालांत भाजपा पयलेच खेप सत्ता स्थापन करतली, तर तामिळनाडूंत सगल्यांक धपको दिवन फिल्म सुपरस्टार विजय मुखार पावलो. द्रमूकाच्या जाग्यार अण्णादम्रूक येतली असो अदमास आशिल्लो. आसामांत अपेक्षे प्रमाण भाजपाची एनडीए आघाडी जिखली. केरळांत सत्ताधारी दाव्यांक काँग्रेस आघाडेन हारयली.
अस्तंत बंगाल विधानसभा वेंचणुकेची मतमेजणी रातीं उसरां मेरेन चालू आशिल्ली. 293 सुवातांचो कल मुखार आयले उपरांत स्पश्ट जालें की, बंगालांत मुख्यमंत्री ममता बॅनर्जी आनी तांचें 15 वर्सांचें सरकार वचपाचे वाटेर आसा. कलांत भाजपा 193 सुवातांचेर मुखार आसा जाल्यार टीएमसी फक्त 95 सुवातांचेर आडावता अशें दिसता. हो फरक थोडो उणो जावं येता. काँग्रेसीक हे वेंचणुकेंत फक्त दोन सुवातो फावो जाल्यो. भारतीय राजकी इतिहासांत भाजपा पयले खेपे अस्तंत बंगालांत सरकार स्थापन करतले.
जंय भाजपा थंय उदरगत
आयज देशांतल्या 20 परस अदीक राज्यांनी भाजप- एनडीएचीं सरकारां आसात. आमचो मंत्र आसा, नागरीक देवो भव. आमी जनतेचे सेवे खातीर वावुरतात आनी हे खातीर जनता भाजपाचेर चडांत चड विस्वास दवरता. भाजप जंय थंय गूड गव्हर्नस, जंय भाजप थंय उदगत हें जनता स्पश्ट पळयतां. तुमी फाटलो 2 वर्सांचो ट्रेंड पळयात. हरियाणांत सेगीत तिसरे खेपे भाजप सरकार जालें, महाराष्ट्रांत भाजपाक व्हड जैत मेळ्ळें, दिल्लींत अद्भूतपूर्व जैत आनी बिहारांत आमी आदले परस व्हड जैत मेळयलें, अशें प्रधानमंत्री नरेंद्र मोदी हांणी सांगलें. ते जैताचे सभेंत उलयताले.
गृह मंत्री अमित शहा हांणी म्हणलां, पक्ष बंगालांतल्याच मनशा कडेन प्रदेशाची जापसालदारकी दितलो.
हें नैतीक जैत न्हय : ममता
अस्तंत बंगालाची मुख्यमंत्री ममता बॅनर्जी हांणी सांगलें, भाजपान 100 परस अदीक सुवातो लुटल्यात. वेंचणूक आयोग भाजपाचो आयोग आसा. आपणें वेंचणूक आयोगाचे मुखेली आनी मनोज अग्रवाल हांचे कडेन लेगीत कागाळ केली, पूण ते कांयच करिना. तुमकां कितें दिसता, हें जैत? हें नैतीक जैत न्हय, अनैतीक जैत आसा. वेंचणूक आयोगान केंद्रीय दळां, प्रधानमंत्री आनी गृह मंत्र्या वांगडा मेळून जे कितें केलां, ते पुराय बेकायदेशीर आसा. ही लूट आसा, लूट आसा, लूट आसा. आमी परतून येतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
