भांगरभूंय | प्रतिनिधी
पणजी: सांकोड्डें रानांत जो वागाचो सांगाडो मेळ्ळा ताच्या मरणाच्या चवकशे खातीर तज्ञ समिती स्थापन जाल्या. राष्ट्रीय वाग जतनाय प्राधिकरण (एनटीसीए), रानां खातें आनी पशू वैजकी चिकित्सा खात्यांच्या अधिकाऱ्यांची समिती मरणाची चवकशी करतली.
रानां खात्याचे अधिकारी जीस वर्की हांणी ही म्हायती दिली. वागाची पिराय जाल्ल्यान ताका सैमीक मरण आयिल्ल्याचो मुळावो अदमास आसा. तरी लेगीत चवकशी जाले उपरांत मरणाचें नेमकें कारण कळटलें. सांकोड्डें वाठारांत फाटलीं बरींच वर्सां कासादोर कासा खातीर भोंवतात. हाका लागून कासादोरा कडल्यान वागाची हत्या जावपाची शक्यताय वाठारांत उक्तायतात.
साकोड्डें रानांत पट्याच्या वागाच्या चामड्याचे दोन भाग सांपडले. हाचो खात्यान पंचनामो केला. वागाक मरण आयिल्ल्याचें निश्चीत आसा. पिराय जाल्ल्यान ताका मरण आयिल्ल्याचेंच सद्या तरी कळटा. तरी लेगीत पोस्टमॉर्टेम आनी चवकशी उपरांत मरणाचें कारण कळटलें, अशें रानां खात्याचे अधिकारी जीस वर्की हांणी सांगलें.
गोंयांत पांच पट्याचे वाग आशिल्ल्याचें स्पश्ट जालां. ताचे पैकीं एका वागाक मरण आयलां की हो दुसरो वाग आसा, हें चवशके उपरांत कळटलें. 2009 वर्सा 1 जाल्यार 2019 वर्सा 4 वागांक मरण आयिल्लें. वागांचो आंकडो उणो जायत आसताना एका वागाक मरण येवप ही हुस्क्याची गजाल आसा. हाका लागून वाग मरपाचें कारण कळप म्हत्वाचें आसा.
2019 वर्सा सत्तरे वागांची हत्या जाल्ली. सांकोड्ड्यां ज्या वाठारांत वागाचो सांगाडो मेळ्ळो त्या वाठारांत कासादोर भोंवतात. हाका लागून हत्येचो दुबाव न्हयकारूंक येना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
