भांगरभूंय | प्रतिनिधी
पुलिसांनी एकल्याक घेतलो ताब्यांत; दुसरो फरार
फोंडें: खाजोड्डें- बोरी, फोंड्यां दीपक राया नायक (58) हांचो कुराडीन गळ्यार हल्लो करून खून करपाची घडणूक आयतारा सांजवेळा घडली. फाटल्यान सावन धांवत येवन कुराडीन सगल्यांत पयलीं तकलेर आनी उपरांत गळ्यार हल्लो केलो. फोंडें पुलिसांनी दीपक नायक हांच्या खून प्रकरणांत साईदीप कुशन नायक हाका ताब्यांत घेतला. जाल्यार ताचो भाव गौरेश कुशन नायक फरार जाला आनी पुलीस ताचो सोद घेतात. दोगूय दुबावीत दीपक नगयक हांव्या बापोलभावाचे चले आसात.
फोंडें पुलीस स्टेशनाचे उपअधिक्षक शिवराम वायंगणकार, निरिक्षक मोहन गावडे आनी हेर पुलीस कर्मचाऱ्यांनी घडणूक थळार वचून पंचनामो केला. फुडलो तपास सुरू आसा.
मेळिल्ले म्हायती प्रमाण आयतारा सांजवेळा दीपक नायक हो घरा मुखार आशिल्ले खोंपींत दवरिल्ले नळे घेवन वतालो. त्याच वेळार दीपक नायक हांच्या बापोलभावाच्या दोगूय चल्यांनी वाद घालो. नळे घेवन वता आसतना एकल्यान दीपक नायक हांचे तकलेर पयलीं कुराडीन वार केलो. उपरांत जमनीर पडले उपरांत गळ्यार वार करून दीपक नायक हांचो खून केलो. घडणुकेचो पंचनामो करून कूड फुडले तपासणी खातीर हॉस्पिटलांत दाखल केल्या.
दीपक नायक आनी दुबावितां मदीं जमनी वेल्यान वाद सुरू आशिल्लो. आयतारा सांजवेळा दीपक नायक हो लागींच आशिल्ले खोपींतले नळे घेवन वता आसतना उतरांचो वाद सुरू जालो. नळे घेवन वता आसतना दीपक नायक हांचे कडेन वाद करीत आशिल्ल्याचो आवाज आयकून तांची भयण घरा भायर आयली. त्या वेळार ह्या दोगांनी कुराडीच्या आदारान दीपक नायक हांचे तकलेर वार केलो. त्याच वेळार दुबावितांनी तांचे भयणीचेर हल्लो करपाचो यत्न केलो. पूण व्हडा व्हडान बोवाळ मारिल्ल्यान शेजारी धांवत आयले.
शेजारचे लोक धांवत आयिल्ल्यान दोगूय दुबावितांनी थंय सावन पळ काडलो. पूण पुलिसांक रोखडोच साईदीप कुशन नायक हाका ताब्यांत घेवपाक येस आयलें. रातीं उसरां मेरेन पुलीस फरार आशिल्ल्या दुबाविताचो सोद घेताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
