भांगरभूंय | प्रतिनिधी
मंत्र्यांच्या कामगिरीचो जातलो नियाळ
पणजी: दोन आमदारांक मंत्रीपद दिवचे पयलीं एका मंत्र्यांक मंत्रीमंडळातल्यान काडचो पडटलो. मंत्र्यांच्या कामगिरीच्या आदाराचेर हो निर्णय जातलो. केंद्रीय नेतृत्वान मंत्र्यांच्या कामगिरीचो नियाळ घेवपाक सुरवात केल्या. भारतीय जनता पक्षाच्या गोपां कडल्यान ही म्हायती मेळ्ळी.
पावसा उपरांत आतां केन्नाय विधानसभेची वेंचणूक जावप शक्य आसा. विधानसभा वेंचणुकेची तयारी करपाचो सल्लो राष्ट्रीय अध्यक्ष नितीन नबीन हांणी मुख्यमंत्री डॉ. प्रमोद सावंत तशेंच प्रदेश भाजप अध्यक्ष दामू नायक हांकां दिला. दिल्ली भेटीत विधानसभा वेंचणुके सयत मंत्रीमंडळ फेरबदलाची लेगीत चर्चा जाली. येता त्या विधानसभा वेंचणुकेचे फाटभुंयेर केंद्रीय नेतृत्वान मंत्र्यांच्या कामगिरीचो नियाळ घेवपाक सुरवात केल्या. मंत्र्यांचें प्रगती पुस्तक तयार जातलें. येता त्या वेंचणुकेच्या तयारे खातीर मंत्र्यांच्या कामगिरीचें प्रगती पुस्तक उपेगी थारतलें, अशें प्रदेश भाजप अध्यक्ष दामू नायक हांणी सांगलें.
आदले मुख्यमंत्री रवी नायक हांच्या मरणा उपरांत मंत्रीपदाचो एक जागो खाली आसा. येता त्या विधानसभा वेंचणुकेचे नदरेंतल्यान हें मंत्रीपद बायल आमदाराक दिल्यार बरें जातलें. बायलां सशक्तीकरणाच्या धोरणाक बळगें दिवपी हो निर्णय थारतलो. तशेंच आनीक एका आमदाराक मंत्रीपदाची लॉटरी लागप शक्य आसा. फाटले खेपे दिगंबर कामत आनी रमेश तवडकार ह्या दोगांचो एकाच वेळार सोपुतविधी जाल्लो. गोविंद गावडे हांचे सुवातेर रमेश तवडकार जाल्यार अालेक्स सिक्वेरा हांचे सुवातेर दिगंबर कामत हांचो मंत्रीमंडळात आस्पाव जाल्लो. आतां एके बायल आमदारा सयत आनीक एका आमदाराचो मंत्रीमंडळात आस्पाव जावपाची शक्यताय आसा. रवी नायक हांच्या जाग्यार बायल आमदाराक मंत्रीपद दिवप सहज शक्य आसा. मात आनीक एकल्याक मंत्रीपद दिवपा खातीर एका मंत्र्याक काडचो पडटलो. मंत्र्यांच्या प्रगती पुस्तकाचेर आदारीत हो निर्णय जातलो. मंत्र्यांच्या कामगिरीचो नियाळ घेवपाक सुरवात जाल्या.
अालेक्स सिक्वेरा हांचे भलायकेंत इबाड जाल्लो. मंत्री आसतनाच ते उपचारा खातीर दिल्ली गेल्ले. अधिवेशनाक हाजीर रावप लेगीत तांंकां शक्य जालें ना. हाचे खातीर मंत्रीपद सोडपाचो सल्लो तांकां पक्षान दिलो. गोविंद गावडे हांचेर कला अकादमीच्या कामा खातीर तरेकवार आरोप जाताले. एके जाहीर कार्यावळींत मुख्यमंत्र्यां कडेन आशिल्ल्या आदिवासी कल्याण खात्याचेर तांणी टिका केल्ली. हाका लागून तांका मंत्रीमंडळातल्यान काडून उडयिल्लो. आतां लेगीत मंत्र्यांची कामगिरी, पक्षा खातीर तांचें योगदान हाचो विचार जावन मंत्र्या विशीं निर्णय जातलो.
रवी नायक हांचे सुवातेर नव्या मंत्र्याचो आस्पाव तशेंच आनीक एका आमदाराक मंत्रीपद दिवपा खातीर खंयच्या मंत्र्याक काडचो? हाचे विशीं एक निकश तयार करपाची आवश्यकता आसा. हाचेर सध्या मुख्यमंत्री तशेंच पक्षाचो विचार सुरू आशिल्ल्याची म्हायती गोपांनी दिली.
रवी नायक हांच्या मरणाक पांच म्हयने जाल्यात. आतां विधानसभा वेंचणूक लेगीत लागीं पावता. हाका लागून खूब वेळ एक मंत्रीपद रितें दवरप पक्षाक परवडपा सारके ना. हाका लागून आमदार तशेंच कार्यकर्त्यां मदीं असंतोश निर्माण जावपाची भिरांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
