भांगरभूंय | प्रतिनिधी
रापणेचे ताजे फडफडीत बांगडे तव्यार भाजचे पयलीं अशे दिसतात. एक सोबीत सुंदर व्हंकल आपलो साज शिरींगार करून आपल्या मोग्याची वाट पळयत बसल्या अशें तव्यार घाल्ल्या बांगड्यांक पळोवन म्हाका सदांच दिसता.
रवो लावन चुरचुरीत फ्राय करतकूच बांगड्यांचें मुखामळ पुराय बदलता…..आनी खावचे पयलीं तांकां पळयत रावन दिसता…. लव्ह एट फर्स्ट सायट….. चडसे खावप्यांक शेपडे कडलो खावपाक भावता. रूचकर लागता आणि मदीं एकच व्हडलो काटो आसता. पूण बोडके कडलो कुडडो खावपांत चड मजा आसता. सुरबुस लागता आनी बोडकेंत चड काटे आशिल्ल्यान नुस्त्याचो बोडके कडलो तुकडो भकावप ही एक चॅलेंज कशी. बोडकेंत उपाट विटमीन्स आसतात अशें वायंगणी दोतोरा कडल्यान आयकुंक मेळटा.
विस्वण जेन्ना उप्पाट पडटात आनी रेटय उणो आसता, तेन्ना चुकनासतना हांव नुस्त्या मार्केटांत वतां. शिरवण म्हयनो येयसर नुस्ते मारपाची बंदी सोंपिल्ली आसता. ताका लागून नु्स्तेकान्नी कडेन विस्वणाचो ‘मेला’ लागिल्लो आसता. ह्या दिसांनी विस्वणाची बोडकाय उपाट मेळतात. तांची ‘कळपुटी’ म्हणल्यार हांव न्हिदेंतल्यान जागो जाता. जिबेक मुतोवपाक व्हरतां.
जाणें कारवारच्या सुके मोरयेच्या बोडकांचे हुमण भुरकावंक ना ताचो हे धर्तरीवेलो जल्म फुकट गेलो अशें म्हाका तरी दिसता. सुके मोरयेच्या बोडकांचें कालवण लाकडांचे चुलीर रटमटपाक लागलें की ताचो घमघमीत वास घर आनी दारांचो अडथळो हुपून गांवभर पातळटा…. मागीर म्हाका गायन दिसता….
माझे माहेर पंढरी,
आहे ‘कारवार’ च्या तिरी….
पूण हेर नुस्त्याच्या बोडके परस ‘धोडयाऱ्या’ची (धोडकारोय म्हणटात) ची बोडकी खावप ही खरी चॅलेंज. धोडयार्याचे बोडकेंत बारीक फातर आसता. पुण बांगड्या परस धोडयारो इस्तिमसांवाचो लागता. म्हाका तर धोडयारो म्हज्या जिवा परस चड आवडटा. तसो चडशे फावटीं म्हाका म्हजे तकलेचो डावट मारता. बारीक सारीक गजाली रोखड्योच म्हजे तकलेंत येनांत. तकलीच लायट गेल्लेवरीं बंद पडटा. बीएसएनएलाचें नेटवर्क जशें येता आनी रोखडेंच वता, तशेंच चडशे फावटीं म्हजे तकलेंत सिग्नल्स पावनांत अशें म्हाका दिसता. घरांत जेन्ना आमचें कास्ताद घेर्र पेट्टा तेन्ना म्हजे मोगाळ घरकान्नीचो म्हजे खातीर पेटंट डायलॉग तयार आसता आणि तो म्हणल्यार….
‘हजारदां तुका सांगलें ‘धोडयारे’ घेवन येवं नाका. सवाय खाण पोटफुगे…धोडयारे खावन खावन तुजे तकलेंत गुंडे भरल्यात…तूं केन्नाय पळय, आपल्याच भानांत आसता.”
शीत अळमी
हालींचीच गजाल, लख्ख हुनेत पडलें आनी आमच्या भाटांतले रोयणेवेली शीत अळमी घसघसून फुलून आयलीं. गोंयांत शीत अळमी आनी शेजारी सिंधुदुर्गात तांकां शृंगार म्हणटात. गोयांत थोड्या वाठारांनी तांका ‘तांदळी अळमी’
म्हणटात.
रानां- वनांनी श्रावणांत हीं शीत अळंबी चड फुलिल्लीं दिश्टी पडटात. गांवठी धव्या कोराच्या गुलाबाच्या झाडाक जशे घोसांनी धवेफुल्ल गुलाब फुलतात तशींच हीं धवीफुल्ल शीत अळंबी दिसतात. ह्या अळंब्यांनी गच्च भरिल्ली रोयण पळोवपाक खूबच सुंदर दिसता.
रोयणीच्या अळंब्यार हुस्केची फांदी भोंवडायतात. रोयणी भितर सोरोप रावतात. हुस्केची ताळी अळंब्यार भोंवडायत जाल्यार सोरोप रोयणींतल्यान भिवून भायर येता आनी फुज्ज्यो काडटा. ताका लागून अळंबी काडपाक सोंपें जाता, अशे जाणकार, आमचे मानाय सांगतात. अळंबी काडपाक गेल्ले कडेन सोरोप चाबून मरण आयिल्ल्यांच्यो कांणयो गांवगिर्या वाठारांनी मीठ मसालो मारून सांगिल्ल्यो कानार पडटात. फांतोडेच्या पारार तरणाटे वा जाणटे खर बॅटरेच्या उजवाडार खांद्यार प्लास्टिकाच्यो पोतयो मारून अळंबी सोदपाक रानां भाटांनी भोंवडेर वतात.
कांदो तळसून शीत अळम्याची सुकी भाजी वा धबधबीत करत जाल्यार नासण्याचे भाकरे वांगडा नाजाल्यार कात्र्यांच्या पावा वांगडा खावचो. बात बन जाए.
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
