भांगरभूंय | प्रतिनिधी
गुजरात टायटन्सान सेगीत चवथ्या जैताची नोंद केली. ताणें राजस्थान रॉयल्साक 77 धांवड्यांनी हारायलो. गुजरातान पयली बॅटींग करतना 4 विकेटी व्हगडावन 229 धांवड्यो केल्यो आनी उपरांत राजस्थानाचो डाव 16.3 ओव्हरींनी 152चेर सोंपयलो.
राजस्थानाच्या एकाय बॅट्समनाक व्हड खेळी करपाक जमली ना. रवींद्र जडेजान सगल्यांत चड 38 धांवड्यो केल्यो. गुजराता वतीन राशीद खानान 33 धांवड्यो दिवन 4 विकेटी घेतल्यो. जाल्यार जेसन होल्डरान 12 धांवड्यो दिवन 3 विकेटी मेळयल्यो. कगिसो रबाडाक दोन विकेटी फावो जाल्यो.
ते आदीं हांगाच्या सवाई मानसिंग स्टेडियमाचेर राजस्थान रॉयल्साचो प्रभारी मुखेली यशस्वी जयस्वालान टॉस जिखून पयली बॉलींग करपाचो निर्णय घेतलो. पूण, गुजरात टायटन्साच्या बॅट्समनांनी हो निर्णय पुरायपणान चुकीचो थारायलो.
गुजरात टायटन्सान निर्धारीत 20 ओव्हरींनी 4 विकेटी व्हगडावन 229 धांवड्यांचो दोंगर उबारलो आनी राजस्थाना मुखार जैता खातीर कठीण आव्हान दवरलें.
गुजरात टायटन्साच्या डावाची सुरवात मुखेली शुभमन गिल आनी साई सुदर्शन हांणी सामकी आक्रमक पद्दतीन केली. हे जोडयेन पॉवरप्लेचे स ओव्हरींनी बिनबाद 82 धांवड्यो केल्यो. जोफ्रा आर्चराचे पयलेच ओव्हरींत 18 धांवड्यांचो पावस घालून गुजरातान आपलो इरादो स्पश्ट केलो.
गिल आनी सुदर्शन हांणी पयले विकेटी खातीर 118 धांवड्यांची विक्रमी भागिदारी केली. साई सुदर्शनान 30 बॉलांनी 55 धांवड्यांचें योगदान दिलें, जाल्यार शुभमन गिलान 44 बॉलांनी 9 चवके आनी तीन सक्यांचे मजतीन 84 धांवड्यांची आकर्शक खेळी केली. गिलाचो अंदूंच्या हंगामांतलो हो चवथो अर्द शेंकडो थारलो.
मदले फळयेंतल्या जोस बटलराक फक्त 13 धांवड्यो करप शक्य जाल्यो. ते उपरांत आयिल्ल्या वॉशिंग्टन सुंदर आनी राहुल तेवतिया हांणी डावाची सुत्रां आपल्या हातांत घेतली. सुंदरान 20 बॉलांनी नाबाद 37 धांवड्यांची म्हत्वाची खेळी केली. जाल्यार तेवतियान फपक्त चार बॉलांनी दोन सक्यांचे मजतीन नाबाद 14 धांवड्यो केल्यो.
अखेरचे ओव्हरींत तुषार देशपांडे आड 21 धांवड्यो केल्यो ताका लागून गुजराताक दोनश्यांचो आंकडो हुपून 229 मेरेन मजल मारप शक्य जालें.
राजस्थाना वतीन ब्रिजेश शर्मान चार ओव्हरींनी 47 धांवड्यो दीत 2 विकेटी घेतल्यो. जाल्यार रवींद्र जडेजा आनी यश राज पुंजा हांकां एकेक विकेट फावो जाली. जोफ्रा आर्चर (46 धांवड्यो) आनी तुषार देशपांडे (52 धांवड्यो) हे राजस्थाना खातीर म्हारगे बॉलर थारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
