भांगरभूंय | प्रतिनिधी
म्हाविद्यालयाच्या विद्यार्थ्यां कडल्यान वेवसायीक दर्ज्याचें काम करून घेवप, हें दिग्दर्शकाचें येस मानचें पडटलें. नाटकाची गती खंयच आडखळ्ळी ना.
अभिराम भडकमकर लिखीत, ‘सुखांशी भांडतो आम्ही’, हें नाटक मानवी सभावांतली गुंतागुंत आनी सुखाच्या सोदांत शेणिल्ल्या संवादाचेर भाश्य करपी एक सशक्त नाटक आसा. कला अकादमी नाट्य म्हाविद्यालयांतल्या अविनाश च्यारी हांच्या दिग्दर्शना खाला फोंडेंच्या राजीव गांधी कला मंदिरांत सादर केल्ल्या ह्या प्रयोगाचें एक संक्षिप्त समिक्षण.
हें नाटक मध्यमवर्गीय मानसिकतेचेर घालो घालता. आयच्या धांवपळीच्या युगांत मनशान सुखाच्यो व्याख्या भौतीक गजालींनी सोदल्यात, पूण मनाची शांती आनी कुटुंबीक संवाद खंय शेणलां, हो प्रस्न अभिराम भडकमकर हांणी ह्या नाटकांत मांडला. सुखां कडेन झगडप ही संकल्पनाच मुळात विरोधाभासी दिसली, तरीय ती आपल्या जगण्यांतले अवस्थेंत जुस्त पारखिता. अविनाश च्यारी हांणी नाटकाची मांडणी करतना पात्रां मदलो तणाव आनी विसव हांचो समतोल राखला. माचये वयलो वावर सहज आनी सैमीक आशिल्लो.
म्हाविद्यालयाच्या विद्यार्थ्यां कडल्यान वेवसायीक दर्ज्याचें काम करून घेवप, हें दिग्दर्शकाचें येस मानचें पडटलें. नाटकाची गती खंयच आडखळ्ळी ना. हेच खातीर प्रेक्षक निमाणे मेरेन कथावस्तूंत गुंतून रावले. म्हाविद्यालयाचे विद्यार्थी आशिल्ल्यान तंत्रीक नदरेन तांचो अभिनय प्रगल्भ दिसलो. दरेका विद्यार्थ्यान आपले भुमिकेक न्याय दिलो. मध्यम वर्गीय घरांतलो तणाव, चिडचीड.. केन्ना तरी उसळून भायर येतलीच. नाटकांतलो हळवेपणा ह्या विद्यार्थ्यांनी प्रभावी तरेन मांडलो.
नेपथ्य, उजवाड येवजण, पार्श्वसंगीत आनी हेर तंत्रीक बाजू प्रयोगाक सोबता तश्यो आशिल्ल्यो. एक बरो नाट्य प्रयोग सादर केल्ले खातीर सगल्या कलाकारांक परबीं.
श्रीधर कामत बांबोळकार
फोंडा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
