भांगरभूंय | प्रतिनिधी
ते दोन भाव जर वीस वर्सां उपरांत भाशे खातीर एकठांय येतात जाल्यार आमी जात, धर्म, प्रांत आनी लिपिवादाच्या जाळांतल्यान केन्ना मुक्त जातले काय म्हणपाचो एक सूर आयकूंक आयलो. तशें पळोवंक गेल्यार ते भाव एकठांय आयले ते भाशे खातीर म्हणूंक जावचे ना. भाशा हें एक तांकां मेळिल्लें निमित्त. ते एकठांय आयल्या सत्ते खातीर. तांकां कशीय करून सत्ता हातासूंक जाय. म्हणजेच ते आपल्या स्वार्था खातीर एकठांय आयल्यात अशें आमच्यांनी म्हणूंक येता. तांकां तांचें अस्तित्व सांबाळूंक भाशेचो आदार मेळ्ळा. तशे गोंयांतूय कांय जाण भाशेच्या नांवांन एकठांय आयल्यात. मराठी मतपेटी तयार करूंक सोदतात ते. गोंयांत अयशीं टक्के मराठी मतां आसात म्हणपाचो साक्षात्कार जाला तांकां. म्हाका एके गजालीचें अजाप दिसता तें म्हणल्यार गोंयांत जर अयशीं टक्के जर मराठी आसात जाल्यार गोंयच्यो सरकारी मराठी शाळा बंद कित्याक पडटात? हे अयशीं टक्के लोक आपल्या भुरग्यांक थंय कित्याक घालिनात?
एक गजाल आमी मतींत घेवंक जाय ती म्हणल्यार कोणूय जरी भाशे खातीर एकठांय आयले मागीर तें गोंय आसूं वा महाराष्ट्र, तरी ते आपल्या बसकांक फकत गर्दी जमयत, पूण ते गर्देचें मतांत परिवर्तन करप तांकां कशेंच शक्य जावचें ना. लोकांक सरकार वाट्टा त्या फुक्या रेवड्यांची इतली सवंय जाल्या की ह्या फुकट मेळपी रेवड्यां मुखार हेर सगळें नगण्य दिसता. मनशाक एकदां लाचारपणान जगपाची सवंय जाली म्हणजे ध्येय बी गेलें तेल लायत. तुमची भास कोणाचें पोट भरची ना. तांकां सत्ताधार्यांक सलाम मारुंकूच जाय. तुमचें मन राखपाक जरी ते तुमच्या बसकांक आयले आनी आमी तुमचेच म्हणून सांगलें तरी भितरल्यान ते ‘फुकट रेवड्यां’चेच आसतात. सद्याचें सरकार तर सगळ्यांक पोशे भरून भरून दिता. इतलेंय आसून तुमी जर मतपेटी तयार करपाची भास उलयतात तर तुमकां दाद दिवचीच पडटली. निमाणें ते दोन भाव आसूं अथवा गोंयचे चार भाव आसूं हे सगळे आपल्याक कसलो तरी लाव जावचो ह्याच विचारान एकठांय येतात. भाशा हें एक निमित्त.
समजुंया मराठी मतपेटी खर्यांनीच तयार जाली जाल्यार ते मत कोणाक दितले? सद्याचें सरकार भाशावाद केन्ना सोंपला म्हणटा. राजभाशा कायद्याक हात लावपाची तांची तयारी ना. हरशीं खंयचोय पक्ष आपल्या स्वार्था खातीर मात्शी गुळमुळीत भुमिका घेता. पूण आमच्या मुख्यमंत्र्यान पयलेच फावट विधानसभेंत स्वश्ट उतरांनी कितें संदेश दिवंक जाय तो दिला. मुख्यमंत्र्यान जे तरेन स्पश्टीकरण दिलां ते खातीर तांचें अभिनंदन करता तितलें उणेंच. म्हणटकूच मराठी मतपेटी काय तांकां मत दिवची ना. आतां उरले कॉंग्रेस आनी आप. समजुंया तुमी कॉंग्रेसीक मत दिवन वेंचून हाडली जाल्यार आपणेच केल्लो राजभास कायदो ते बदलून आपलें हांशें करून घेतले? तांचो हायकमांड तांकां तशें करूंक दितलो? आपाची भुमिका सगळेच जाणात. ते रोमीचो विचार करीत पूण न्हय मराठीचो. उल्लो पोगो मागपी पक्ष. तांकां मूळ गोंयकारांचो फायदो करचो आसा. मागीर मराठी भाशकांक ते मूळ गोंयकार कशे मानतले? आतां हे मराठी करतल्यांनी एक वेगळो पक्ष काडचो पडटलो. पूण तुमकां कोण आनी कितलीं मतां दितले तें मात पयलीं पळेयात. नासल्यार पणजेची पुनरावृत्ती जाल्यार तकली वयर काडूंक मेळची ना.
आसूं तर आतां आमी प्रांत, जात, धर्म आनी लिपिवादाच्या जाळांतल्यान मुक्त जावंक जाय म्हणपाचो विचार आयकूंक मेळ्ळो, तशें हाचे पयलींय जायते जाणांनी जात, धर्म हांतल्यान कुशीक सरपाचो आनी लोकांक कुशीक काडपाचो जायतो यत्न केला. पूण तांकां काय यश मेळ्ळें ना. आमच्या संतांनी कितें थोडे यत्न केले? पूण जमलेंना तांकां तें. उरफाटें जायतें सोसचें पडलें. अशें आसतना ह्या बंधनांतल्यान मुक्त जावंक जाय म्हणप हें धाडसाचें म्हणचें पडटलें. कारण जाळांतल्यान मुक्त जातले जाल्यार जाळ तोडचें पडटलें आनी हें जाळ काय सहजतायेन तुटचेलें ना. सद्याच्या काळार तर कांय जाणांक धर्माचो इल्लो चडूच पुळको आयिल्लो दिसता.
आतां प्रश्न म्हणटा तो लिपिवादाचो. हो वाद मुळांत सुरू जालोच कित्याक? कोणे हाचेर विचार केलो? आमकां केन्नाच रोमी लिपी परकी दिसली ना. कोंकणी चळवळी वेळार विरोधक विचारताले, कोंकणीची लिपी खंयची? नागरी लिपी तांकां तांचेंच बेंस दिसतालें. आनी आमी त्या वेळार अभिमानान सांगताले आमचे कडेन एक न्ही तर पांच- पांच लिपी आसात. कोंकणीक भाशेचो दर्जो मेळ्ळो आनी सगळे आमकां पयसावले? कित्याक? समजुंया कांय तांत्रीक वा प्रशासकीय कारणांक लागून एकूच लिपी करची पडली जाल्यार तांकां लागीं घेवन समजावपाचो कोणे यत्न केलो? करूंक नाका आसलो? हाचेर कसलो तरी तोडगो काडूंक नाका आसलो? आमच्या खांदाक खांद लावन भाशे खातीर झगडपी आमकां परकी दिसले आनी कोंकणीचेर सदांच वीख ओंकपी आमकां आमचे दिसले जाल्यार ताणीं कित्याक वांगडा रावचें? दर एकल्याक स्वाभिमान आसतलोच न्ही? मागीर आमी कोणाक दोश दितले?
कांय प्रशासकीय कारणांक लागून एक लिपी आसूं येता. पूण जंय लिपी लागच ना थंय तरी तांचो आसपाव जावंक नाका आसलो? ह्याच दिसांनी फाटल्या तीन वर्सांचे ज्ञानपिठकार केळेकार पुरस्कार वांटले. हातूंत एकलोय रोमीचो मनीस मेळ्ळो ना तुमकां. पंचवीस वर्सां फाटल्यान चार भक्ती रचना केल्ल्याक पुरस्कार मेळटा पूण रोमींतल्यान कोंकणीची सेवा करप्यांक कायच ना हें कशें? कशें तुट्टलें जाळ सांगात पळोवया?
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
