भांगरभूंय | प्रतिनिधी
कोलकाता दोतोर बलात्कार आनी खून प्रकरणनवी दिल्लीः कोलकाताच्या आरजी कार मेडिकल कॉलेज आनी हॉस्पिटलांतल्या प्रशिक्षीत दोतोराचेर बलात्कार आनी खून जाल्ल्यान मुखेल न्यायाधीश डी. वाय. चंद्रचूड हांच्या फुडारपणा खाला सर्वोच्च न्यायालयाच्या तीन न्यायाधिशांच्या खंडपिठान खर हुस्को उक्तायला. तशेंच दोतोरां खातीर कामाचे सुवातेर सुरक्षे खातीर कार्य प्रक्रिया तयार करपाक 9 वांगड्याचो टास्क फोर्स तयार करपाचो आदेश दिला.
ह्या वेळार सर्वोच्च न्यायालयान अस्तंत बंगाल राज्य सरकाराकूय शिटकायला. पोस्टमार्टेमचो
अहवाल पयलींच भायर आयिल्लो, तेन्ना गुन्यांव नोंद करपाक कळाव कित्याक? असो प्रस्नूय ताणें मांडलो. तशेंच आर जी कार हॉस्पिटलाचेर जाल्ल्या मॉब हल्ल्याच्या चवकशे विशीं आनी बलात्कार-हत्या प्रकरणाच्या चवकशेच्या स्टेटस रिपोर्टा विशीं तशेंच अद्ययावत म्हायती विशीं अस्तंत बंगालाक 22 ऑगस्ट मेरेन स्टेटस रिपोर्ट सादर करपाचो निर्देश सर्वोच्च न्यायालयान दिला.
सर्वोच्च न्यायालयान आपल्या अधिकारा खाला राष्ट्रीय टास्क फोर्साची थापन करून कामाच्या सुवातेर दोतोरांच्या सुरक्षे खातीर कार्यपद्दती सुचयली. तातूंत वेगवेगळ्या फाटभूंयचे दोतोर आसतले, जे भारतभर पाळपाच्यो पद्दती सुचयतले, जाका लागून कामाच्या सुवातेर सुरक्षीत वातावरण आसचें आनी तरणाटे वा मध्यम पिरायेचे दोतोर आपल्या कामाच्या वातावरणांत सुरक्षीत आसतले अशें न्या. चंद्रचूड हांणी सांगलें.
—————
राष्ट्रीय टास्क फोर्सांत कोणाचो आस्पाव
सर्जन व्हायस एडमिरल आर सरीन, डॉ. डी नागेश्वर रेड्डी, डॉ. एम श्रीनिवास, डॉ. प्रतिमा मूर्ती, डॉ. गोवर्धन दत्त पुरी, डॉ. सौमित्र रावत, प्रा. अनिता सक्सेना, हेड कार्डियोलॉजी, एम्स दिल्ली, प्रा. पल्लवी सप्रे, डीन- ग्रांट मेडिकल कॉलेज मुंबय, डॉ. पद्म श्रीवास्तव, न्यूरोलॉजी विभाग, एम्स हांचो टास्क फोर्सांत आस्पाव आसा. तशेंच मुंबयंतल्या नामनेच्या बायलां दोतोरांचोय हातूंत आस्पाव आसा.
————–
आंदोलकांचेर कारवाय करची न्हय
आंदोलकांचेर बळजबरेन कारवाय करची न्हय असो उलो सर्वोच्च न्यायालयान बंगाल सरकाराक केला. “शांतताप्रीय आंदोलकांचेर कारवाय करूं नाकात. तांकां अत्यंत संवेदनशीलतायेन हाताळात, अशें न्यायालयान सांगलें. दोतोर आनी बायलां दोतोरांची सुरक्षीतताय ही राष्ट्रहिताची गजाल अशें सर्वोच्च न्यायालयान निरिक्षण नोंदयले. तशेंच कांय पावलां उबारपा खातीर देश आनीक एक बलात्कार जावपाची वाट पळोवंक शकना, अशेंय न्यायालयान नमूद केले.
14 ऑगस्टाक मध्यान रातीं जाल्ल्या निशेधा वेळार हॉस्पिटलांतल्या तोडफोडी विशींय न्या. चंद्रचूड हांणी प्रस्नचिन्न उबें केलें. हॉस्पिटलाचेर लोकांनी हल्लो केलो. गंभीर सुविधांक लुकसाण केले. ह्या वेळार पुलीस कितें करताले? पुलिसांनी पयलीं गुन्यांव जाल्ली सुवात सुरक्षीत दवरची पडटली अशें न्यायालयान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
