‘खाजगी’ कामगार हिताय !

भांगरभूंय | प्रतिनिधी

मुख्यमंत्र्यान केली 5 येवजण्यांची घोशणा

मरण आयल्यार विम्या खाला 50 हजारांची भरपाय

20 वर्सां काम केल्ल्या कामगारांचो भोवमान

भांगरभूय । प्रतिनिधी

पणजी : कामगाराक अपघाती मरण आयल्यार विमो येवजणे खाला ताका 50 हजारांची अर्थीक भरपाय मेळटली जाल्यार जखमी जाल्यार 25 हजारांची भरपाय मेळटली. गोंयांत 1 लाख 40 हजार कामगारांची नोंदणी जाल्या. येवजणेचो लाव घेवपा खातीर कामगारांनी मजूर खात्या कडेन नोंदणी करची, असो उलो मुख्यमंत्री डॉ. प्रमोद सावंत हांणी मारला. खासगी कंपन्यां मदीं 20 वर्सां काम केल्ल्या कामगारांचो 15 हजार रुपयांची रक्कम दिवन भोवमान जातलो.

कामगार दिसा निमतान मजूर खात्या वतीन लोकभवनांत सरकारी कार्यावळ जाली. कामगार खात्याचे मंत्री बाबूश मोन्सेरात तशेंच हेर मानेस्त कार्यावळीक हाजीर आशिल्ले.

खासगी कंपन्यांनी 20 वर्सां परस चड वर्सां काम केल्या वेंचीक कामगारांचो ह्या वेळार भोवमान जालो. श्रम गौरव श्रमीक मित्र पुरस्कार दिवन भोवमान जालो. कामगारां खातीर पांच नव्या येवजण्यांची घोशणा मुख्यमंत्र्यांनी केली.

देशाच्या तशेंच गोंयचे उदरगतींत कामगारांचें व्हड योगदान आसा. आत्मनिर्भर भारता सयत 2037 मेरेन विकसीत गोंयचे उद्दिश्ट साध्य करपा खातीर कामगारांच्या योगदानाची गरज आसा. सरकारी कर्मचाऱ्यां प्रमाण आतां खासगी कंपन्यांनी लेगीत बरो पगार मेळटा. खासगी कंपन्यांनी 20 वर्सां परस चड काम केल्ल्या सगल्या कामगारांचो हे फुडें भोवमान जातलो. गोंयांत दोन तरांचे कामगार आसा. तरेकवार कारखान्यांनी काम करपी कामगार आनी बांदकाम मळार काम करपी कामगारांची स्वतंत्र नोंदणी आसा.

कामगारां खातीर डिजिटल साक्षरताय कार्यावळ, ज्येश्ठ नागरिकांक वैजकी उपचार भरपाय, आयआयटी, नीट सारख्या परिक्षांक कोचिंगा खातीर अर्थीक मजत, उंचेल्या शिक्षणा खातीर ट्युशन फी माफ करपी येवजण जाहीर जाली. तशेंच प्रधानमंत्री विमो सुरक्षा येवजण लेगीत कामगारांक लागू जातली. बांदकाम कामगारां खातीरच्या कल्याण निधींत वर्सान वर्स वाड जायत आसा. मात हे निधीचो फावो त्या प्रमाणांत विनियोग जावंक ना. बांदकाम वाठारांतल्या कामगारांनी कामगार खात्या कडेन नोंदणी करची. कामगारांच्या कल्याणा खातीर ह्या निधीचो विनियोग जातलो, अशें मुख्यमंत्र्यांनी सांगलें.