भांगरभूंय | प्रतिनिधी
फाटल्या वर्सा परस 291 कोटींनी गोंयची येणावळ वाडली
नोव्हेंबरात 503 कोटींंची जीएसटी येणावळ
पणजी : फाटल्या वर्साचे तुळेंत अंदूं राज्याची जीएसटी येणावळ वाडत आसा. एप्रील ते नोव्हेंबर ह्या 8 म्हयन्यांत राज्याची जीएसटी येणावळ वट्ट 2616 कोटींची आसा. फाटल्या वर्सा एप्रील ते नोव्हेंबर मेरेनची जीएसटी येणावळ 2325 कोटी आशिल्ली अंदूं राज्याची जीएसटी येणावळ फाटल्या वर्साचे तुळेंत 291 कोटी चड आसा.
अंदूं गोंयचीच न्हय जाल्यार पुराय देशाची जीएसटी येणावळ फाटल्या वर्सा परस चड आसा. नोव्हेंबराचो विचार केलो जाल्यार गोंयची अंदूंची जीएसटी येणावळ 503 कोटींची आसा. फाटल्या वर्सा नोव्हेंबराची जीएसटी येणावळ 447 कोटी आशिल्ली. ही वाड 12 टक्के आसा. नोव्हेंबरात पुराय देशाची जीएसटी येणावळ 167929 कोटी आसा. हातूंत सीजीएसटी 30420 कोटी आसा जाल्यार एसजीएसटी 38226 कोटी आसा. तशेच सेस रक्कम 12274 कोटींची आसा.
पुराय देशात नोव्हेंबराची जीएसटी येणावळ फाटल्या नोव्हेंबराचे तुळेंत 15 टक्के चड आसा. अंदूं 2023 – 2024 अर्थीक वर्सा एप्रील ते नोव्हेंबर मेरेन पुराय देशाची जीएसटी येणावळ 567464 कोटी जाल्या. फाटल्या वर्सा एप्रील ते नोव्हेंबर मेरेनची येणावळ 507355 कोटी आशिल्ली. अंदूं देशाची 8 म्हयन्यांतली जीएसटी येणावळ फाटल्या वर्सा परस 12 टक्के चड आसा.
एप्रीलांत सगल्यांत चड जीएसटी येणावळ
गोंयचो विचार करीत जाल्यार एप्रीलांत 620 कोटींची जीएसटी येणावळ जमा जाली. सगल्यांत चड येणावळ एप्रीलांत जमा जाल्या. फाटल्या वर्साचे तुळेंत अंदूं दरेकी म्हयन्यांत जिएसटीची येणावळ वाडल्या.
फाटल्या वर्साचे तुळेंत अंदूं एप्रीलांतल्या जीएसटी येणावळ वाडीचें प्रमाण 32 टक्के आशिल्लें. मे म्हयन्यांतली वाड 13 टक्के, जूनांतली वाड 12 टक्के, जुलयांतली 22 टक्के, ऑगस्टांतली 36 टक्के, सप्टेंबरांतली वाड 16 टक्के जाल्यार नोव्हेंबरांतली वाड 12 टक्के आसा.
सरासरीचो विचार करीत जाल्यार अंंदूं म्हयन्याची सरासरी जीएसटी येणावळ 327 कोटी आसा. कर्नाटक, महाराष्ट्र, गुजरात, बिहार, उत्तर प्रदेश, राजस्थान हीं राज्यांं गोंया परस व्हड आशिल्ल्यान ह्या राज्यांंची जीएसटी येणावळ नोव्हेंबरात 1 हजार कोटींं परस चड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
