भांगरभूंय | प्रतिनिधी
भलायकी मंत्र्याची म्हायती; कांक्र, काळजा दुयेंसाचें दुयेंती
डीडीडीएसएसवाय येवजण
फाटल्या साडेचार वर्सांत दीनदयाळ स्वास्थ्य सेवा येवजणे खाला (डीडीएसएसवाय) कांक्र आनी काळजा दुयेंसाचे वट्ट 303 दुयेंती गोमॅकाँतल्यान हेर राज्यांतल्या हॉस्पिटलांनी दाखल करून तांचेर उपचार केल्यात अशी म्हायती भलायकी मंत्री विश्वजीत राणे हांणी दिली.
बेळगांवच्या केएलई हॉस्पिटलांत सगल्यांत चड 91 जाल्यार मुंबयंतल्या टाटा मेमोरियल हॉस्पिटलांत 68 दुयेंतींचेर उपचार केले. तशेंच बंगळुरू, पुणें, चेन्नय हांगासरल्या हॉस्पिटलांनी दुयेंतींक धाडून संबंदीत हॉस्पिटलांक ‘डीडीएसएसवाय’ खाला खर्च दिल्ल्याचें भलायकी मंत्र्यांनी सांगलें.
गोमॅकाँत कांक्र आनी काळजा दुयेंसाच्या दुयेंतींचेर उपचार करतात. पूण ताचे परस दर्जेदार उपचार मेळचे हे खातीर दुयेंतींक ‘डीडीएसएसवाय’ खाला आस्पावीत आशिल्ल्या हेर राज्यांतल्या हॉस्पिटलांनी धाडून दितात. ह्या साडेचार वर्सांत वट्ट 463 दुयेंतींक गोमॅकॉन हेर सुवातांनी धाडून तांचेर येवजणे खाला उपचार केले. पूण तातूंतले 160 दुयेंतींक गोंयांतल्या मणिपाल, अपोलो व्हिक्टर बी हॉस्पिटलांनी धाडून दिल्ल्याचेंय तांणी सांगलें.
पांच वर्सांत 5,506 कांक्र दुयेंतींचेर गोमॅकाँत उपचार
फाटल्या पाच वर्सांत गोमॅकाँत 5,506 कांक्र दुयेंतींचेर उपचार केल्ल्याची म्हायती भलायकी मंत्र्यांनी दिली. ऑगस्ट 2018 ते डिसेंबर 2019 ह्या देड वर्सांत 1,447, 2020 वर्सा 949, 2021 वर्सा 970, 2022 वर्सा 1,154 आनी चालू वर्सांतले सुरवातेच्या स म्हयन्यांत 536 दुयेंतींचेर उपचार केल्ल्याचेंय तांणी स्पश्ट केलें.
‘डीडीएसएसवाय’चेर साडेचार वर्सांत 203.21 कोटी खर्च
– ‘डीडीएसएसवाय’ येवजणेंत आस्पाविल्ल्या गोंया सयत हेर राज्यांतल्या हॉस्पिटलांक येवजणे खाला फाटल्या साडेचार वर्सांत सरकारान 203.21 कोटी रुपया फारीक केल्यात अशी म्हायती भलायकी मंत्र्यांनी दिली.
– 2019-20 वर्सा सुमार 33.99 कोटी, 2020-21 वर्सा सुमार 43.26 कोटी, 2021-22 वर्सा सुमार 53.04 कोटी, 2022-23 वर्सा सुमार 39.98 कोटी, जाल्यार 2023-24 वर्सा ते आतां मेरेन 32.92 कोटी रुपया हॉस्पिटलांक फारीक केल्यात.
– डीडीएसएसवाय’ येवजणे खाला वैजकी उपचारां खातीर तीन आनी ताचे परस उणें वांगडी आशिल्ल्या कुटुंबा खातीर वर्साक अडेज लाख जाल्यार चार वा ताचे परस चड वांगडी आशिल्ल्या कुटुंबां खातीर वर्साक चार लाखांचो फुकट विमो दितात. हातूंत राज्यांतल्या 42 खाजगी, 8 सरकारी आनी गोंया भायल्या 15 खाजगी हॉस्पिटलांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
