भांगरभूंय | प्रतिनिधी
मामलेदारांचे न्यायालय शेनवारा आसतलें चालू ः मुख्यमंत्री सावंत
पणजी ः भाटकाराच्या 300 चौखण मिटर जमनीतली घरां मुंडकार कायद्या खाला मुंडकारांच्या नांवार करपाची प्रक्रिया राज्य सरकारान सुरु केल्या. हे खातीर प्रलंबीत आशिल्लें मुंडकार प्रकरण सोडोवपा खातीर मामलेदारांचे न्यायालय शेनवारा चालू आसतले अशें मुख्यमंत्री डॉ. प्रमोद सावंत हांणी सांगलें.
‘आत्मनिर्भर भारत- स्वयंपूर्ण गोंय’ मोहिमे वतीन स्वयंपूर्ण मित्र, सरपंच, पंच, नगरसेवक आनी नागरिकां कडेन व्हर्च्युअल संवाद कार्यावळींत ते उलयताले. गोंय मुक्त जावन 60 वर्सां जाली तरी लेगीत घर- जमनी आपल्या नांवार आसा हें मुंडकारांक खबर ना. सध्या मुंडकार कायद्या खाला उत्तर गोंयांत 2000 आनी दक्षिण गोंयांत 1500 अर्ज प्रलंबीत आसात. ह्या अर्जाचे बेगोबेग निवाडो लावपाच्यो सुचोवण्यो मामलेदारांक दिल्यात. ते खातीर शेनवारा लेगीत तांचीं न्यायालयां चालू आसतली. मुंडकार प्रकरणांचो सुरवातीच्या टप्प्यांत निवाडो जातलो. ते उपरांत कुळ आनी देवळाच्या जमनींत आशिल्ल्या प्रकरणांचो निवाडो लावपाची प्रक्रिया सुरू जातली अशें मुख्यमंत्र्यान सांगलें.
सरकारी तशेंच खाजगी क्षेत्रांत तरणाट्यांक चड नोकऱ्यो मेळपा खातीर सरकारान मुख्यमंत्री अप्रेंटिशीप येवजण सुरू केल्या. आतां मेरेन हजारांनी तरणाट्यांक ह्या येवजणेचो फायदो जाला आनी तांकां प्रशिक्षण दिवपाचें काम सुरू आसा. हांचें फुडें सरकारी नोकऱ्यां खातीरय अप्रेंटिशीप प्रमाणपत्र सक्तीचें करतले. देखून तरणाट्यांनी हे येवजणेचो लाव घेवन आपापल्या मळार कुशळ जावचें अशें आवाहन तांणी केलें.
राज्य सरकाराचे ‘आत्मनिर्भर भारत- स्वयंपुर्ण गोंय’ मोहिमेची दखल देशांतल्या वेगवेगळ्या राज्यांनी घेतला. हे मोहिमेक लागून सरकारान राज्याची सर्वांगीण उदरगत साध्य करपाचो यत्न केला. प्रधानमंत्री नरेंद्र मोदीचें सपन आशिल्लें 2047 वर्साचें विकसीत भारत साकार करपा खातीर ही मोहीम म्हत्वाची थारतली असोय विस्वास मुख्यमंत्र्यान उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
