भांगरभूंय | प्रतिनिधी
प्रतिनिधींची नोंदणी अपेक्षे परस सामकी उणी
पणजी, प्रतिनिधी : अंदुंच्या चित्रपट महोत्सवांत (इफ्फी) 20 हजार चित्रपट प्रतिनिधींची उपस्थिती आसतली, अशें भाकीत मुख्यमंत्री डॉ. प्रमोद सावंत हांणी केल्ले. प्रत्यक्षात मात 7709 प्रतिनिधींची नोंदणी जाली. हाचे पयकी 4675 प्रतिनिधींनी शुल्क फारीक करून उपस्थिती लायली. 2219 प्रतिनिधी महोत्सव थळाचेर आयलेच ना, अशी म्हायती गोपांनी दिली.
अंदुंचो चित्रपट महोत्सव 20 ते 28 नोव्हेंबर ह्या काळात जालो. माधुरी दिक्षीत, मधुर भंडारकर, सलमान खान हांचे उपस्थितीक लागून महोत्सवाक ग्लॅमर आयले. प्रतिनिधींची उपस्थिती मात वाडली ना. ती फाटल्या महोत्सवां इतलीच आशिल्ली.
मनरिजवण संस्थे कडल्यान मेळिल्ले म्हायती प्रमाण, 7709 जाणांनी प्रतिनिधी खातीर नोंदणी केल्ली. हे पयकी 6894 जाणाक प्रतिनिधी म्हूण मान्यताय मेळ्ळी. 4675 जाणांनी प्रतिनिधी शुल्क फारीक केलें. प्रतिनिधी अर्ज मान्य जावन सुद्दा 2219 जाणांनी शुल्क फारीक केलेंच ना.
अंदु प्रतिनिधी कार्डांचो बरोच घोळ जालो. काय प्रतिनिधींक उसरां कार्डा मेळ्ळीं. दर वर्सा 6 ते 8 हजार प्रतिनिधींची नोंदणी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
