भांगरभूंय | प्रतिनिधी
पणजीः गोंयांत १५ दीस पावतलो इतलो एलपीजी सिलिंडरांचो स्टॉक उकलरला. हे विशीं केंद्रीय पेट्रोलियम मंत्र्याकडेन उलयलां आनी तांणी गोंयांत उपलब्ध आशिल्ल्या सिलिंडराचो अहवाल धाडपाक सांगलां, अशें मुख्यमंत्री डॉ. प्रमोद सावंत हांणी सांगलें.
सभाघरांत शुन्य वरां वेळार साळगांवचे आमदार केदार नायक हांणी राज्यांत वेवसायीक एलपीजी सिलिंडराचे पुरवणेंत उणावाचो विशय मांडिल्लो. तांचे प्रस्नाक जाप दितना मुख्यमंत्री डॉ. प्रमोद सावंत उलयताले.
ट्रॉलर आनी व्हडल्यो बोटी नुस्तें मारपा खातीर १० दीस दर्यांत वयतात आनी तांकां दयार्र्ंत बोटींचेर रांदपा खातीर भरपूर सिलिंडरांची गरज पडटा. तशेंच बारीक हॉटेल आनी रेस्टॉरंटांनी वेवसायीक एलपीजी सिलिंडराची पुरवण उणी जाल्या. हे विशीं एजन्सी संपर्क केल्यार हे सिलिंडर दिवपांत पुराय बंदी घाल्ल्याचें तांकां सांगतात, अशी कागाळ नायक हांणी केली.
हे विशीं जाप दितना मुख्यमंत्र्यान सांगलें, वेवसायीक सिलिंडर पुरवण बंद करपा विशीं काल परिपत्रक आयलां.
हांव रातीं पेट्रोलियम मंत्र्याकडेन हे विशीं उलयलां. तांणी सांगिल्ले प्रमाण केंद्रान आयज दनपरा तीन सचिव पांवड्यार एक समिती स्थापन केल्या. खंयच्या राज्यांत कितलो सांठो उपलब्ध आसा आनी कितली पुरवण आमी घरगुती आनी वेवसायीक दिवपाक मेळटा ह्या विशयाचेर ही समिती नियाळ घेतली, अशें मुख्यमंत्र्यान सांगलें.
आयज दनपार मेरेन गोंयचो अहवाल केंद्राक धाडटले. उपरांतच गोंयांत सिलिंडर पुरवणदार आनी एजन्सी आसात तांकां निर्देश वतले. सद्याचे घडयेक उण्यात उण्या १५ दिसांचो सांठो उपलब्ध आसा हे विशींचे एजन्ट आनी सांठ्याचो तपशील हांव घेत आसां, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
