भांगरभूंय | प्रतिनिधी
पणजी, खास प्रतिनिधी : १ जानेवारी ते ३१ ऑक्टोबर २०२३ ह्या १० म्हयन्यांत येरादारी खात्यान विवीध नवे २६ हजार ३७९ येरादारी परवाने जारी केल्यात. तातूंत खात्याक ८ कोटी ९५ लाख रुपयांचो महसूल मेळ्ळा. हातूंत दोन-चार चाकी, जड वाहनां तशेंच हेर वाहनांच्या येरादारी परवान्यांचो आसपाव आसा. तशेंच ह्याच काळांत वट्ट ४९ हजार ३४८ लर्नींग लायसनां दिल्यांत.
मडगांव आरटीओंतल्यान सगळ्यांत चड ५ हजार ८६५ परवाने दिले. उपरांत म्हापशें आरटीओंतल्यान ५ हजार ३१५ जाल्यार पणजेच्यान ३ हजार ५०२ नवे परवाने दिल्यात. धारबांदोडें आरटीओंतल्यान सगळ्यांत उणे ३८५ नवे येरादारी परवाने दिले. तशेंच काणकोण (६८७), पेडणें ( ११४२), केपें (१८९६), वास्को (२४८३), दिवचल (२६७५), फोंडों (२८१८) ह्या आरटीओंचो क्रमांक लागता.
राज्यांत येरादारी परवाने जारी करपा खातीर येरादारी खात्यांत सुमार ८० हजार ट्रांजेक्शन जालें. हातूंत वाहन परवान्यांचें नुतनीकरण, नांवांत वा नाम्यांत बदल, डुप्लिकेट परवानो दिवप, चालकांक बॅज दिवप, परवान्याची मुजत वाडोवन दिवप, दोन आनी चार चाकीचो परवानो एक करप अश्या विवीध सेवांचो आसपाव आसा. हें सगळे मेळून फाटल्या धा म्हयन्यांत येरादारी खात्यांत परवान्या खातीर सुमार एक लाखां परस चड ट्रांजेक्शन जालें.
वाहन परवानो मेळपाचें प्रमाण ९९.९९ टक्के!
राज्यांत जानेवारी ते ऑक्टोबर मजगतीं राज्यांत वाहन परवान्या खातीर २६ हजार ३७१ अर्ज आयिल्ले. हांतल्या २६ हजार ३६९ जाणांक परवाने दिले. हे प्रमाण ९९.९९ टक्के इतके आसा. जाल्यार लर्नींक लायसन्सां खातीर ५१ हजार २७६ अर्ज आयिल्ले. तांतले ४९ हजार ३४८ मंजूर जाले. हाचें प्रमाण ९७ टक्के आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
