भांगरभूंय | प्रतिनिधी
पणजी : गिरकावाडो, हरमलाच्या सीआरझेड वाठारांत चार मजली इमारतीचें बेकायदेशीर बांदकाम करपी धनयान १३ डिसेंबर २०२३ आदीं ते मोडटलो, अशी हमी गोंयच्या मुंबय उच्च न्यायालयाक दिल्ली. पूण मुजत सोंपपाच्या एका दिसा पयलींच तो सर्वोच्च न्यायालयांत गेला. हे विशीं आयज सुनावणी आसा. रवी हरमलकर हांचे सयत राजेश दाबोळकार हांणी बेकायदेशीर बांधकामा विशीं उच्च न्यायालयांत याचिका दाखल केल्या. हातूंत राज्य सरकार, हरमल पंचायत सचीव, इमारत धनी अशोक कंधारी आनी पंचायत संचालक हांकां प्रतिवादी केल्यात.
गिरकरवाड्या वयली ही इमारत बंगळूराच्या अशोक कंधारी हांची. ह्या बांदकामाक हरमल पंचायतीचो परवानो ना. हे विशीं रवी हरमलकार हांणी पंचायती कडेन कागाळ केल्ली. ताची पंचायतीन दखल घेवंक ना. उपरांत अशोक कंधारी हे उच्च न्यायालयांत गेल्ल्यान पंचायतीन बांदकाम मोडपाचे निर्देश दिवनूय ताची अंमलबजावणी स्थगीत दवरिल्ली. सीआरझेड विभागांत अशे तरेचीं खूब बांदकामां उबीं आसात. उच्च न्यायालयान २५ ऑक्टोबराक ही हॉटेल इमारत सील करपाचे आदेश उपजिल्हाधिकारी आनी पेडणें पुलीस निरीक्षकाक दिल्लें. हॉटेलाचें उदक आनी वीज जोडणी ४८ वरांनी काडून उडोवची, अशें तातूंत नमूद केल्लें. खंडपीठान आदेश जारी करून संबंदीत इमारत सील करपाक सांगिल्लें. उपरांत कंधारी हांणी खंडपीठांत हमी दिवन स सप्तकांत हें बांदकाम मोडटले अशें सांगिल्लें. इमारतीक घाल्ले कुलूप काडपाची मागणीय तांणी केल्ली.
हे विशीं खंडपीठान कंधारी हांकां बांदकाम मोडून उडोवपाक १३ डिसेंबर मेरेन मुजत दिल्ली. तशेंच सरकाराक इमारत मोडिल्ल्याचो कृती अहवाल सादर करपाक खंडपीठान सांगिल्लें. हें बांदकाम मोडून घालपाक एकूच दीस उरिल्ल्यान कंधारी हे आपलें बांदकाम वाटोवपाक सर्वोच्च न्यायालयांत गेल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
