भांगरभूंय | प्रतिनिधी
बुधवार मेरेन प्रतिज्ञापत्र सादर करचें: खंडपीठ
पणजी: हणजूण पंचायतीचे सरपंच तुळशीदास चिमुलकार, पंचायत वांगडी शीतल नायक आनी हेरांनी दर्यादेगेर बांदकामाक बंदी आशिल्ल्या वाठारांत उबारिल्लीं चार बांदकामां आयज (ता. 21) बंद करचीं असो आदेश मुंबय उच्च न्यायालयाच्या गोंय खंडपिठान जारी केला. तशेंच तांकां प्रतिवादी करून नोटीसी दिल्यात आनी बुधवारा 23 ऑगस्ट मेरेन प्रतिज्ञापत्र सादर करपाचे निर्देश दिल्यात.
हणजूण पंचायतीचे सरपंच, पंच आनी हेरांनी दर्यादेगेर बांदकामांक बंदी आशिल्ल्या वाठरांतलीं आपलीं बांदकामां सोडून हेरां आड कारवाय केल्ल्याचो दावो करून निनावी पत्र आयिल्ल्याची म्हायती घेवन अॅमिकस क्युरी अॅड. अभिजीत गोसावी हांणी मुंबय उच्च न्यायालयाच्या गोंय खंडपिठांत सादर केल्लें.
ह्या प्रकरणांत खंडपिठान गोंय दर्यादेग क्षेत्र वेवस्थान प्राधिकरण (जीसीझॅडएमए) आनी हणजूण ग्रामपंचायतीक चवकशी करपाचे आदेश दिल्ले. तातूंत तथ्य दिसून आयिल्ल्यान खंडपिठान हीं बांदकामां आयजूच (ता. 21) बंद करपाचो आदेश जारी केलो. तशेंच संबंदितांक म्हणणें सादर करपाचो आदेश दिवन फुडली सुनावणी 23 ऑगस्टाक दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
