भांगरभूंय | प्रतिनिधी
म्हापशें, प्रतिनिधी ः मोंतेरोवाडो- हणजुण्यां बर्डो बार अँड रेस्टॉरंटाच्या गुदांवांक उजो लागलो. तातूंत देड लाख रुपयांचें लुकसाण जालें. जाल्यार 5 लाख रुपयांचो म्हाल उजो पालोवपी दळान वांटायलो.
शेनवारा सकाळीं सुमार 11.45 वरांचे ही घडणूक घडली. म्हायती मेळटकच म्हापशें उजो पालोवपी दळाचे जवान थंय पावले. तो मेरेन गुदांवांचे कुडींत उजो पातळिल्लो उपरांत उजो पालोवपी दळान उदकाचो फवारो मारुन उजो पालयलो.
बार्राच्या फाटल्यान आशिल्ल्या सुक्या तणाक कोणे तरी उजो लायिल्लो. तो पातळ्ळो आनी गुदांवांचे कुडीक लागलो. तांतूत लांकडी फर्निचर, खाट, गादी, म्हत्वाचीं कागदपत्रां, दोन आलमारी आनी हेर वस्तू लासल्यात. देड लाखांचें लुकसाण जालें जाल्यार रेस्टॉरंटाची हेर मालमत्ता उजो पालोवपी दळान वांचयली.
उजो पालोवपी दळांचे अधिकारी अशोक परब हांच्या फुडारपणा खाला विष्णु गांवस, प्रेमानंद कांबळी, तुकाराम रेडकार, परेश मांद्रेकार, भिकाजी काळोजी आनी अशोक वळवयकार जवानांनी उजो पालयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
