भांगरभूंय | प्रतिनिधी
मडगांव, प्रतिनिधी: नागरी पुरवण खात्या कडल्यान राज्यांतल्या सवाय धान्य दुकानदारांचे (सोसायटी) सेवेंत वाड करून तांकां अर्थीक लाव दिवपाचो यत्न केला. रेशन दुकानांचेर कॉमन सर्व्हीस सेंटर आनी इंडियन पोस्ट पेमेंट बँक सर्व्हीस दिल्ल्यान ते विशीं दक्षीण गोंयच्या रेशन दुकानदारांक म्हायती दिली. हांतल्यान दुकानदारांक फायदो जातलो, अशें अखील गोंय सवाय धान्य दुकानदार असोसिएशनान सांगलें.
नागरी पुरवण खात्या वतीन दक्षीण गोंयच्या सोसायट्यां खातीर बसका आयोजीत केल्ली. रेशन दुकानदारांक धान्य वाटपा वांगडा कॉमन सर्व्हीस सेंटर सुविधा आनी पोस्टल सेवा दिल्यार तांकां आनीक फायदो जातलो. कॉमन सर्व्हीस सेंटरांत दिवपी सेवांक पोस्टाच्यो सेवा मेळपाक शकतात. पोस्टाचे सेवेंत धा हजारां मेरेन पयशे आधारकार्ड क्रमांका वरवीं काडप वा खात्यांत भरपाक शकतात, पेन्शनधारकांक हयातीचे दाखले दिवप अश्या सुविधां खातीर कॉम्पुटराची गरज ना. तें स्मार्टफोनाचेरूय दिवं येता. ह्यो सुविधा रेशनधान्य दुकानदार वा तांच्या घरांतल्यो व्यक्ती युजर्स नेम आनी पासवर्ड वापरून करपाक शकतात. तशेंच भांगर आनी वैयक्तीक रीण सेवा जांकां जाय तांणी आपलो संपर्क क्रमांक कार्यालयांत दिल्यार, रिणाची पुरवण केल्या उपरांत रेशनदुकानदाराक कमिशन म्हणून कांय रक्कम दितले, अशें मार्गदर्शन कार्यावळीक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
