भांगरभूंय | प्रतिनिधी
बोवाळ करून प्रवाशांनी गाडी थारायली
पणजी : पणजी सावन वाळपय वचपी कदंबा बशीचो चालक सोरो पियेवन गाडी चलयतालो, असो आरोप प्रवाशांनी केलो. प्रवाशांनी बस थारावन चालकाक देंवयले उपरांत म्हामंडळान दुसऱ्या चालकाची वेवस्था केली. चालक सोरो पियेल्लो. हाका लागून बस झेलपडटाली, असो आरोप प्रवाशांनी केलाे.
बसीच्या चालकाक पुलिसांनी ताब्यात घेतला. ताची तपासणी जातली. अल्कोहोल चांचणी जातली. चवकशे उपरांत कारवाय जातली, अशी म्हायती कदंब म्हामंडळाचे सरवेवस्थापक संजय घाटे हांणी दिली. चालकाचेर कारवाय जातली. हाचे पयली चवकशी जावपाची गरज आसा, अशें तांणी सांगलें.
प्रवाशां कडल्यान मेळिल्ले म्हायती प्रमाण जीए 03 X 0515 नंबराची कदंबा गाडी पणजे सावन वाळपय वताली.
ही गाडी पणजे सावन सांजे 6.30 वरांचेर सुटली. चालकाक गाडी चलोवपाक जायनासली. गाडी चलयतना तो सिटा वेल्यान पडटालो. एकदां तर एका दुचाकीक धपको बसपाचो, मातसो चुकलो. प्रवाशांनी बोवाळ करून ताका गाडी थारावपाक लायली. गाडयेंतल्यान सगले प्रवाशी देंवले. प्रवाशांनी बोवाळ केले उपरांत मदीं कंडक्टरान सुद्दा ताका गाडी चलोपाक जाता काय ना, अशें विचारलें. तरी लेगीत चालक गाडी चलयत रावलो. चालका कडेन गाडी झेलपडटा अशें कळटकीर प्रवाशांनी बोवाळ केलो. पोरणें गोंय पुलिसांनी त्या चालकाक ताब्यांत घेतलो. प्रवाशांनी ही म्हायती दिली.
गाडयेचो चालक सोरो पियेवन गाडी चलयतालो. चालका सयत कंडक्टराचेर कारवाय करपाची मागणी प्रवाशांनी केली. गाडी थारायले उपरांत वाळपय वचपी प्रवाशी रस्त्या कुशीक बरोच तेप उरले. कदंब वेवस्थापनान पर्यायी चालक धाडलो आनी गाडी वाळपय वचपाक गेली.
सोरो पियेवन वाहन चलोवपाचेर बंदी आसा. सोरो पियेल्ल्या चालका कडेन गाडी चलोवपाक कशी दिली, असो प्रश्न प्रवाशांनी केलो.
चवकशी उपरांत कारवाय : कदंब म्हामंडळ
एल्वीस रॉड्रिगीश अशें चालकाचें नाव आसा. ह्या चालकाक पोरणें गोंय पुलिसांनी ताब्यांत घेतला. ताची अल्कोहोला खातीर चांचणी जातली. चवकशे उपरांत कारवाय जातली. सोरो पियेन गाडी चलोवपाचो आरोप प्रवाशांनी केल्लो आसलो, तरी तशें म्हणपाक जायना. चालकाक चक्कर येवप शक्य आसा. तशेंच शुगर वाडली वा हेर दुयेंसाक लागून ताचे कडल्यान गाडये वेले नियंत्रण सुटप शक्य आसा, अशी म्हायती म्हामंडळाचे सरवेवस्थापक संजय घाटे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
