भांगरभूंय | प्रतिनिधी
मडगांव, प्रतिनिधी ः सोनसडो प्रकल्पांतलो इतलीं वर्सां सांठोवन दवरिल्लो कोयर काडून उडोवपाची प्रक्रिया आनी ताचे कडेन संबंदीत कामांक सुरवात जाल्यांत. सोनसड्याचीं कामां जानेवारीच्या निमाणे मेरेन पुराय जातली. गोंय घन कोयर वेवस्थापन म्हामंडळ नव्या प्रकल्पाचेर काम करता अशी म्हायती आमदार दिगंबर कामत हांणी दिली.
प्रसार माध्यमां कडेन उलयतना आमदार कामत हांणी सोनसडो कोयराची समस्या जानेवारी मेरेन सुटावी जातली अशें सांगलें. आमी हालींच सोनसडो कोयर प्रकल्पाची पळोवणी केल्ली. सोनसडो कोयर प्रकल्पांतलो कोयर आमी डिस्पोजल करतले अशें आमी सांगिल्लें. ते प्रमाण आतां काम सुरू आसा. प्रकल्पाच्या सुवातेर सुमार 85 टक्के काम पुराय जालां. थंयतलो कोयर काडला आनी आतां त्या जाग्यार घाण येना अशें तांणी सांगलें.
गोंय घन कोयर वेवस्थापन म्हामंडळानय कोयराचेर सुदारणा करपाचें काम सुरू केलां. ह्या वेळार आमदार कामत हांणीय सोनसडो प्रकल्पांतली सुवात जानेवारीच्या निमाणे मेरेन पुरायपणान रिती जातली असो विस्वास उक्तायला. गोंय घन कोयर वेवस्थापन म्हामंडळ त्या जाग्यार नवो प्रकल्प उबारपाचे तयारेत आसा. पुण्यांत आशिल्ल्या प्रकल्पाची पळोवणी करपा खातीर पालिका अधिकारी, गोंय प्रदुशण नियंत्रण मंडळाच्या अधिकाऱ्यां वांगडा थंय भेट दिली अशेंय तांणी स्पश्ट केलें.
पार्किंग प्रकल्पाच्या कामाक बेगीनूच सुरूवात
मडगांव शारांतल्या बहुमजली पार्किंग प्रकल्पाचें काम निमाण्या पांवड्यार पावला. बहुमजली पार्किंग प्रकल्प आनी मडगांव पालिका इमारतीची देखरेख आनी दुरुस्ती कामां खातीर प्रस्ताव जी सुडाक दिला. चार दिसां आदीं पालिकेन गरजेची परवानगी दिल्या. 5 ते 6 डिसेंबराक जी सुडाची बसका जातली तेन्ना ह्या प्रकल्पांक मान्यताय मेळटली आनी कामां सुरू जातली अशेंय आमदार कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
