भांगरभूंय | प्रतिनिधी
वास्को, प्रतिनिधी ः नवें वाडें वास्को आयज सकाळीं राश्ट्रोळी जय संतोषी माता देवळा लागसार रांदपाच्या गॅस सिलिंडराक गळटी लागून एक भिरांकूळ घडणूक घडली. हांतूत गुरवार आशिल्ली शिवानी राजावत (26) आनी तिची आवय जयदेवी चौहान हांकां मरण आयले. सिलिंडराक गळटी लागून हो प्रकार घडलो, अशी म्हायती उजो पालोवपी दळांच्या जवानांनी दिल्या.
हे कुटुंब मूळ मध्यप्रदेशांतलें. तें हांगा बिराडाक रावतालें. शिवानी हिचो घोव अनुराग नौदलात काम करता. शिवानी गुरवार आशिल्ल्यान तिची आवय जयदेवी गोंयात तिचे मजतीक आयिल्ली. हीं तिगूय आयज मध्यप्रदेशाक गांवाक वचपाचीं आशिल्लीं. पूण ताचे पयलींच ही भिरांकूळ घडणूक घडली.
रांदचे कुडींतल्या सिलिंडराक गळटी लागिल्ली. तांका लागून कुडीत एलपीजी गॅस एकठांय जावन उरिल्लो. ही गजाल तांच्या लक्षांत आयली ना आनी सकाळीं कुडींतले लायटीचें बटन दाबतकच स्फोट जालो आनी तांका दोगांक मरण आयले. ही म्हायती मेळताच उजो पालोवपी दळ घडणूक सुवातेर मजतीक हाजीर जालें. वास्को पुलिसांनी पंचनामो करुन कूडी चांचणी खातीर गोमेकाँत धाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
