भांगरभूंय | प्रतिनिधी
नवी दिल्ली, खबरां संस्था ः आयकर खात्यान ६ डिसेंबराक काँग्रेसीचे राज्यसभा खासदार धीरज साहू हांच्या १० सुवातींचेर धाड घाल्ली. झारखंड, ओडिशा आनी अस्तंत बंगालांत घाल्ल्या धाडींनी आतां मेरेन ३०० कोटी परस चड रोख रक्कम जप्त केल्या.
आयकर महासंचालक संजय बहादूर हांच्या म्हणण्या प्रमाण ही आतां मेरेन एकेच धाडीत मेळिल्ली सगळ्यांत व्हडली रक्कम. ८ डिसेंबराक ४० ल्हान- व्हड मशीनां वरवीं नोटांची मेजणी सुरू जाली, ती शेनवारा रातीं मेरेन चालूच आशिल्ली. हे धाडी उपरांत धीरज साहूच्या घरांतल्यान जप्त केल्ल्या नोटींच्या राशीचे फोटो व्हायरल जावपाक लागल्यात.
ईडी, सीबीआय, आयकर विभागाक मनी लॉंड्रींग, आयकर फसवणूक वा हेर गुन्यांवकारी प्रकरणांत तपास, चवकशी, छापे घालपाचे आनी स्थीर मालमत्ता जप्त करपाचे अधिकार आसतात. ह्यो एजन्सी जप्त केल्ली रक्कम आपल्या ताब्यांत घेतात आनी उपरांत न्यायालयाच्या आदेशान ती रक्कम आरोपींक परत दितात वा ती सरकाराची मालमत्ता जाता.
सुप्रीम कोर्टाचे वकील विराग गुप्ता हांच्या म्हणण्या प्रमाण, जेन्ना आयकर विभाग आनी हेर तपास यंत्रणां तपासा खातीर छापो घालता तेन्ना ताचे दोन भाग आसतात. पयलो अटक आनी चवकशी, दुसरो पुरावे एकठांय करप. तपास यंत्रणांनी घातिल्ले छापे विवीध म्हायतीचेर आदारून आसतात. अशे परिस्थितींत आरोपीचेर एकदांच छापो घालतले अशें ना. खुबश्या टप्प्यांचेर छापे घालतात.
मालमत्ता जप्त करपाचे अधिकार
सगळ्या तपास यंत्रणांक पयशे आनी वस्तू जप्त करपाचे कायदेशीर अधिकार मेळ्ळ्यात. जर प्राप्तीकर विभागाक छापे मारून पयशे वा हेर वस्तू मेळ्ळ्यार ते प्राप्तीकर कायद्या प्रमाण जप्त करूं येतात.
छाप्यांत जायत्यो वस्तू जप्त करूं येतात. हातूंत कागदपत्रां, रोख आनी भांगरा-रुप्याचे वस्तींचो आसपाव आसता. छाप्यांत जप्त केल्ल्या सगळ्या वस्तूंचो पंचनामो जाता. पंचनामो तपास संस्थेच्या १० अधिकार्यां वरवीं जाता. पंचनाम्याचेर दोग स्वतंत्र साक्षीदारांच्यो सयो आसतात. तशेंच जाचो माल जप्त केला त्या व्यक्तीची सय ताचेर आसता. पंचनामो तयार केल्या उपरांत जप्त केल्लो माल केस पॉपर्टी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
