भांगरभूंय | प्रतिनिधी
भांगरभूंय । प्रतिनिधी
दिवचलः सारमानस- पिळगांव हांगा फेरी धक्क्याचेर ड्रायव्हरान व्हेगनआर गाडी सरळ उदकांत घातिल्ल्यान धबधबो हांगच्या यतीन महादेव मयेकार (29) हाका मरण आयलें. गाडयेंत आशिल्ल्या पर्यटक बायलेन आपल्या चल्या सयत गाडयेंतल्यान उडी घेतिल्ल्यान तांचो जीव वांचलो. गाडी चलोवपी यतीन हाका काळजा आताक आयिल्ल्यान ताचे गाडये वयलें नियंत्रण गेलें असो मुळावो अदमास आसा. पोस्ट मॉर्टेमा उपरांत व्हो अपघात जावपाचें कारण स्पश्ट जातलें अशें पुलिसांनी सांगलें.
ही घडणूक मंगळार 28 नोव्हेंबराक सांजे 6.30 वराच्या सुमाराक जाली. मेळिल्ले म्हायती प्रमाण यतीन मयेकार व्हो जीए 06 डी 9472 ही मारुती व्हेगनआर ही गाडी घेवन मुंबयचो अमीत कोरगांवकार, ताची घरकान्न यशश्री कोरगांवकार आनी चलो अयान कोरगांवकार (12) हांका करमळी रेल्वे स्टेशऩार सोडपाक घेवंन वतालो. सारमानस हांका फेरी धक्क्याचेर चारचाकी गाडयांची गर्दी आशिल्ली. रेल्वे स्टेशनाचेर वेळार पावप गरजेचें आशिल्ल्यान अमीत कोरगांवकार सकल देवूंन रांगेत ताच्या फुडें आशिल्ल्या कारवाल्यांक तांची गाडी फुडें व्हरपाक विनवणी करपाक लागलो. त्या वेळार यतीन ड्रायव्हर सीटार पडलो आनी गाडी देंवते वयल्यान सकल वचपाक लागली. यशश्रीन प्रसंगावधान राकून गाडयेचें दार उगडून चलल्या सतय भायर उडी मारली. आनी तितले म्हणसर गाडी सरळ उदकांत गेली.
धक्क्या कडेन आशिल्ल्या लोकांनी यतीनाक गाडयेंतल्या भायर काडलो. ह्या अपघाताक लागून फेरी धक्क्यार व्हडलो बोवाळ जालो. निखील वरगांवकार (सारमानस), पांडुरंग कुंडयकार, लक्ष्मीकांत भामयकार, नारायण कवळेकार (माठवाडो- पिळगांव) हांणी उदकांत वचून उदकांत गेल्ल्या गाडयेचो ड्रायव्हर यतीन मयेकारार भायर काडलो. मात तागेली कसलीच हालचाल जायनाशिल्ली. यशश्री कोरगांवकार ही नर्स आशिल्ल्यान तिणे ताची नाडी पळयली.
हे घडणुकेक लागून सारमानस तें सांन्तइस्तेव फेरीसेवा बंद पडली. फेरीधक्क्या खाला गाडी आशिल्ल्यान फेरी व्हरपाक मेळनाशिल्ली. रातयां 8 वरांच्या सुमाराक व्हेगनआर गाडी दिवचलच्या उजो पालोवपी दलाच्या जवानांनी उदका भायर काडली. दिवचल पुलिसांनी अपघाताचो पंचनामो केलो. उजो पालोवपी दलाचो अधिकारी शिवाजी नायक आनी ताच्या पंगडान मजत काम केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
