भांगरभूंय | प्रतिनिधी
भांगरभूंय । प्रतिनिधी
पोरणे गोंयः मंगळारच्यान पडपाक लागल्ल्या पावसाक लागून कुडका पंचायत वाठारांत सान्तान चर्ची कडल्यान रस्त्याची राखणे वणत बुधवारा फांतोडेर कोसळ्ळी. सुदैवान येरादारी नासतना ती कोसळल्ल्यान कसलीच वायट गजाल घडली ना. वणत कोसळल्ली आसतनाय येरादारी सुरू आशिल्ली. सोशल मीडियांत वणत कोसळल्ल्याचो खबरो येवपाक लागतगीर रस्तो येरादारी खातीर बंद केलो.
राखणे वण्टीक व्हडली वेर पडल्ल्याचें कांय दिसां आदी आपणे सोशल मीडिया वरवीं सामकार हाडल्लें. ते उपरांत बांदकाम खात्याच्या अधिकाऱ्यांनी तिची पळोवणी केली. मात बुधवारा ती कोसळ्ळी अशें वणत कोसळ्ळे उपरांत सगल्यांत पयलीं थंय आयिल्ल्या कुडकाचो उपसरपंच विनेश आडपयकारान सांगलें.
राखणे वण्टीक धोको आसा अशें आमी आमचे तपासणी अहवालांत नमूद केल्लें बांदकाम खात्याच्या एका अधिकाऱ्यान सांगले. येरादारी खातीर रस्तो कित्याक बंद केलो ना अशें विचारलें तेन्ना ताचे कडेन जाप नाशिल्ली. हे राखणे वण्टीचो चडशें बांदकाम 2014 वर्सा केल्लें. ह्या रस्त्यार अपघात जावपाक लागल्ल्यान रस्त्याची उंचाय वाडोवन राखणे वणत बांदल्ली अशी म्हायती सान्त आंद्रेचो आमदार विरेश बोरकारान दिली. नवी राखणे वणत बांदपा खातीर सुमार 45 लाख रुपये लागतले म्हणून ती बांदपा कडेन बांदकाम खात्यान आड नदर केली. अपघात जावचे न्हय म्हणून रस्ताची उंचाय वाडोवन पार्पेट वणत बांदली अशें ताणे सांगलें. सेंट अॅनाचें फेस्त 26 जुलयाक आसा ताचे पयलीं राखणे वणत बांदतले काय ना, अशें विचारलें तेन्ना आपूण कांय सांगपाक शकना अशें ताणे सांगलें.
बाबत दर्जाच्या कामाक लागून राखणे वणत कोसळ्ळी असें आम आदमी पक्षाचो फुडारी रामाराव वाघ हाणे सांगलें. ह्या कामाची चवकशी करून कंत्राटदाराक ब्लॅक लिस्टांत घालपाची मागणी ताणे केल्या. थळावो आमदार आनी बांदकाम खात्याच्या अधिकाऱ्यांनी वण्टीची पळोवणी केली. वण्टेक वेर पडिल्ली दिसतना येरादारी बंद कित्याक केली ना, असो प्रश्न ताणे केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
