भांगरभूंय | प्रतिनिधी
पणजी, ज्ञानेश्वर वरक : सोशल मिडिया सध्या हनी ट्रॅपाचो हॉटस्पॉट जातना दिश्टी पडटा. अनोळख्या कडल्यान फेसबूक, इंस्टाग्राम, आनी आतां खाजगी टॅलेग्राम, व्हॉट्स अॅपार लेगीत हनी ट्रॅपाचो सांपळो लायिल्ल्यो मॅसेजी येवपाक लागल्यात. ‘भांगरभूंय’च्या सुत्रांक आयिल्ल्यो कांय मॅसेजी आमच्या हाताक लागल्यात.
कांय अनोळखी नंबरा वयल्यान टॅलेग्रामार आनी व्हॉट्स अॅपार कोणा कडेन उलोवपाक, इश्टागत करपाक आनी डॅटींगेक जाय जाल्यार चलयांचे संपर्क नंबर दिवपाक शकतात, अश्यो मॅसेजी येतात. तांचे कडल्यान चड म्हायती समजून घेवपाचो यत्न केल्यार आदीं पयशे भरून वांगडी जायात उपरांत सगळे डिटेल्स धाडटा, असो मॅसेज येता. वांगडी जावपाक तांची मेंबरशीप फी लेगीत थारिल्ली आसा. एका म्हयन्याची, स म्हयन्यांची ते फी घेतात. कोणूय असो मेंबर जालो जाल्यार तांकां चलयांक धाडपा खातीर म्हूण फोटो मागयतात. ते फोटो वापरून जीय टूलचो वापर करून ब्लॅक मेलींग करपाच्यो गजाली हाचे आदीं उजवाडाक आयल्यात.
सोशल मिडियाचेर तरणाट्यांक लक्ष्य करतात. वांगडी जाल्ल्यांक फ्रॅण्ड रिक्वेस्ट धाडून उपरांत सुरवेक तांचे कडेन गोड गोड उलयतात. कांय दिसांनी व्हिडियो कॉल करून अश्लील उलोवप आनी खाजगी फोटो आनी व्हिडियो मागप. आपुणूय तशे फोटो, व्हिडियो धाडपाचें उतर दितात. एकदां त्या तरणाट्याचे फोटो आनी व्हिडियो हाताक मेळ्ळे उपरांत ताचें ब्लॅक मेलींग करून पयशे मागप सुरू जाता.
सोशल मिडियाचेर फ्रेण्ड जाले उपरांत ताच्या फ्रेंड लिस्टान कोण कोण आसात ताची म्हायती एकठांय करून दवरप आनी मागिल्ले पयशे दिना जाल्यार ते अश्लील फोटो आनी व्हिडियो ताच्या इश्टाक धाडटा अशें सांगून ब्लॅकमेल करप. हो धंदो सध्या नेटान चल्ला.
एक म्हणल्यार अश्यो गजाली केन्ना कोण कोणाक सांगिना, हाचोच गैरफायदो ते लोक घेतात. पुलीस केस करपाक गेल्यार फ्रेण्डशीप कशी जाली ताची खोलायेन म्हायती दिवची पडटा. अशे तरेचे अश्लील फोटो कोणाक धाडप म्हणल्यार गुन्यांव. दुसरी गजाल म्हणल्यार लजेक म्हारग जावपाची शक्यताय अदीक आसता. हे खातीर ह्यो गजाली लिपून उरपाक सोंपें जाता.
तरणाट्यांनी अनोळखी मनशां कडेन सोशल मिडियाचो कसो वापर करचो, कशें आनी कितलें उलोवचें, फोटो वा व्हिडियो शॅर करतना धा फावटी विचार करचो पडटलो. अश्यो हनी ट्रॅपाचीं प्रकरणां गोंयांत आतां उजवाडाक येवपाक लागल्यात. अशा प्रकरणांचो तपास करचे खातीर डीआयजी असलम खान हांच्या मुखेलपणा खाला 12 वांगड्यांची समिती वेंचल्या. गोंयांत अश्या प्रकरणांनी कांय जाणांक ताब्यांत घेवन चवकशी चल्ल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
