भांगरभूंय | प्रतिनिधी
दिवचल, प्रतिनिधी ः प्रधानमंत्री नरेंद्र मोदी हांणी रोटी कपडा आनी मकान ही संकल्पना चालीक लायल्या, फुडल्या पांच वर्सां खातीर फुकट रेशन दिवपा वांगडाच प्रधानमंत्री हावसिंग येवजणे खाला 12 कोटी घरां दिवपाची वेवस्था केल्या. कपड्याची बँक सुरू करून आनी गरजेवंतांक फुकट कपडे दिवपा खातीर सेवा उपक्रम चालीक लावन रोटरी क्लब सांखळीन व्हड योगदान दिलां. भौशीक बसस्टॅण्ड वाठारांत असल्यो सेवा कार्यावळी करप गरजेचें. तिचो लाव घेतना लोकांनी बसस्टॅण्ड नितळ दवरचें असो उलो मुख्यमंत्री डॉ. प्रमोद सावंत हांणी मारला.
मुख्यमंत्र्यान कदंब बसस्टॅण्ड वाठारांत रोटरी क्लब साखळीन सुरु केल्ले गरजेवंत लोकां खातीरचे कपड्यांचे बँकेचें उक्तावण केलें. अध्यक्ष सूरज नायक, नगराध्यक्ष रश्मी देसाय, पुरस्कर्ते रोहन शिरोडकार, प्रकल्प अधिकारी दत्तराज गायतोंडे, योगेश लवंदे, दयानंद बोरयेकार, देवीदास बोरयेकार आदी हाजीर आशिल्ले.
लोकांक जाय तितले दीस हे सुवातेर कसलेय तरेचे कपडे दवरूंक मेळटले, पूण योग्य रितीन दवरचे. गरजूंक हे कपडे व्हरपाक मेळटले. ही वेवस्था 24 वरां आसतली. मुख्यमंत्र्यान ह्या उपक्रमाची तोखणाय केली. गरज आशिल्ल्यांक कपडे दिवन वेगळी सेवा केल्ले सारकें जातलें.
कदंब बसस्टॅण्ड आतां सेवा केंद्र जालां आनी ताची देखरेख करप ही दरेका नागरिकाची जापसालदारकी आसा अशें डॉ. सावंत हांणी सांगलें.
अध्यक्ष सूरज नायक हांणी ह्या उपक्रमाची सविस्तर म्हायती दिली, लोकांनी दान करतना धुविल्ले कपडे दवरचे. सगल्या पिरायेच्या दादले-बायलांचे कपडे दान करपाक मेळटात, अशें तांणी सांगलें.
राहुल परब हांणी सूत्रसंचालन केलें. प्रकल्पाक प्रायोजकत्व दिल्ल्या खातीर रोहन शिरोडकाराक परबीं दिली. रोटरी क्लब साखळीच्या ह्या अभिनव उपक्रमाची सगळ्यांनी तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
