साक्षी चौधरीक बाॅक्सिंगेत भांगरा पदक
भांगरभूंय | प्रतिनिधी
पणजी : दोन फावटीं युवा संवसारीक जैतिवंत थारिल्ली बाॅक्सर साक्षी चौधरीन (२२) राष्ट्रीय खेळां सर्तींत भांगरा पदक मेळ्ळां. तें गोंया वतीन खेळटा. ताणें मध्य प्रदेशाच्या मलायकाक हारयलें.
साक्षीक २०२२ वर्सा खांद्याची दुखापत जाल्ली. तें पांच म्हयने बाॅक्सिंग रिंगणांतल्यान भायर उरलें. पोरुं भोपाळाक जाल्ल्या ज्येश्ठ बायलांच्या राष्ट्रीय सर्तींत ताणें ५४ कील गटांत सर्व्हिसीस वतीन भांगरा पदक मेळयलें आनी परत आपल्या खेळां प्रवासाक सुरवात केली.
साक्षी हें हरयाणाच्या भिवाणी जिल्ह्यांतल्या धनाना गांवांतलें. ह्या गांवाक ‘मिनी क्युबा’ म्हणटात. क्युबांत जशे बाॅक्सर तशेच हांगाय. विजयेंद्र हो भिवाणी जिल्ह्यांतलोच. बायलां बाॅक्सिंगे खातीर सर्विसीसान साक्षीक पयले बॅचीक वेंचून काडले उपरांत ताणें तत्काळ आपली गुणवत्ता दाखयली. आतां साक्षीक गोंयांत पोस्टींग मेळ्ळां. तें 37 वे राष्ट्रीय खेळां सर्तींत खेळ्ळें आनी ताका भांगरा पदक मेळ्ळें.
ताणें 50 किलो फ्लायवेट बाॅक्सिंग विभागांत आरडी-16 सर्तींत हरियाणाच्या कल्पना आड 5-0 अशी जैत मेळोवन पयले खेप खिताब मेळयल्लो. “हांव फाटले स म्हयने गोंयांत प्रशिक्षण घेता. हांगा प्रशिक्षणाची सुविधा बरी आसा. राज्यांतल्या नव्या बाॅक्सरांक मजत जातली’ अशें ताणें सांगलें.
हांग्झो आशियाई खेळां सर्तींत निखात झरीनान पयलींच 50 कील वजन वर्गांत पॅरिस ऑलिंपिक कोटांत प्रवेश मेळयला. हेर वजन गटांतूय दुसऱ्यो भारतीय बाॅक्सर आसात. ताका लागून फुडल्या कांय म्हयन्यांत पात्रताय मेळोवपाक साक्षीक दुसऱ्या वजन गटांत वच्चें पडटलें. 2021 वर्साच्या आशियाई चॅम्पियनशिपांतली कांस्य पदक जैतिवंत साक्षीन वजनाच्या गटांत बदल करपाचें थारायलां.
बापूय मनोज हांच्या ५० व्या वाडदिसा वेळार साक्षी
साक्षीचो बापूय मनोज कुमार ताका दरदिसा स्कूटरी वयल्यान 20 किमी प्रवास करून प्रशिक्षणा खातीर व्हरतालो. 15 वर्सां पिरायेचेर साक्षीक नामना मेळ्ळी. एआयबीए वर्ल्ड ज्युनियर बायलां चॅम्पियनशिपाच्या फायनलींत तिणें अमेरिकेच्या राष्ट्रीय जैतिवंत यारिसेल रामिरेजाक हार घाल्ली.
रिंगणांतल्या गती आनी चपळाये खातीर नांव जाल्ल्या साक्षीन 2019 वर्सा सिनियर सर्किटांत वच्चें पयलीं दोन युथ वर्ल्ड चॅम्पियनशिप खिताब जोडिल्ले. तिका लागीं लागीं टोकियो ऑलिंपिक पंगडांत सुवात मेळिल्ली, पूण कोवीड मदीं आयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
