भांगरभूंय | प्रतिनिधी
मडगांव, प्रतिनिधी : नुवेंच्या समंथा फर्नांडीस हिच्या हुंडोबळी प्रकरणांत सासू पॅट्रिसिना फर्नांडीस हिचे आड गुन्यांव नोंद जाला. हे विशीं दुबावी पॅट्रिसिना हांणी अटकपूर्व जामिना खातीर अर्ज केला. हाचेर निवाडो दितना अटी आनी सर्तींचेर जामीन मंजूर केलो.
मजगतीं, तीन म्हयन्यां पयलीं नुवेंची समंथा फर्नांडीस (३०) हिका उज्यांत हलपून मरण आयिल्लें. हुंड्या खातीर सासू करपी छळाक लागून ती उबगल्ली अशें सांगून सासूच्या आड खुनाचो गुन्यांव नोंद करपाची मागणी समंथाची आई ऍना मारिया डायस हिणें केल्ली.
गुन्यांव नोंद जाय मेरेन समंथाची कूड स्विकारचेना अशें तिणें म्हणिल्लें. आतां न्यायदंडाधिकार्यांच्या अहवाला उपरांत मायणा- कुडतरी पुलिसांनी सासूमाय पॅट्रोसिना फर्नांडीस हिचे आड गुन्यांव नोंद केला. दुबावीत पॅट्रिसिना हांणी दक्षीण गोंय जिल्हो आनी न्यायालयांत अटकपूर्व जामिन्या खातीर अर्ज दाखल केला. ह्यान पयलींचे सुनावणेक समंथान आत्महत्या करूंक नाशिल्ल्याचो दावो तिचे आवय ऍना हिणें केल्लो. तशेंच दुबाविताच्या वकिलान तिणें स्वताच जळोवन घेतिल्ल्याचे नमूद आसा अशें सांगिल्लें. जाल्यार समंथाचो घोव तिका खर्चा खातीर पयशे दितालों आनी कसलेच तरेचो छळ तिचेर जायनाशिल्लो अशें सांगिल्लें. समंथान लासून घेतिल्ल्या दिसा आपले आवयक कॉल केल्लो. तशेंच घोवा वांगडा केल्लें चॅटींग सादर केल्यार ह्या प्रकरणांत आनीक कितें तरी कळून येतलें अशें सांगलें.
ह्यान पयलीं सुनावणे वेळार समंथा आनी तिचो घोवा मदल्या व्हॉटसऍप चॅटची म्हायती न्यायालयांत केल्ली. समंथान ते दीस आपले आवयक तीन फावटीं कॉल केल्लो. पूण ते विशीं न्यायालयांत कांयच सादर करूंक ना.
हे विशीं न्यायालया कडल्यान दोन वटेनचो युक्तीवाद आयकून घेतल्या उपरांत दुबावीत पॅट्रीसिनाक अटींचेर अटकपूर्व जामीन मंजूर केला. दुबावीताक ५० हजारांचो वैयक्तीक बॉण्ड, पुरावे नश्ट करचे न्हय, न्यायालयाचे परवानगे बगर देशा भायर वचें न्हय, साक्षीदाराचेर चेंपण हाडचें न्हय अश्यो अटी घालून जामीन मंजूर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
