सनबर्न महोत्सवाक आतां ग्रामसभांनीय विरोध
भांगरभूंय | प्रतिनिधी
पणजी, प्रतिनिधी : मोपा विमानतळा लागसार सनबर्न करपाचो विचार उक्तायलो तेन्नाच ताका विरोध जावपाक सुरवात जाली. सनबर्न स्थलांतरीत करपाक आमदार मायकल लोबो हांणी विरोध केल्लो. आतां पेडणें म्हालांत जाल्ले ग्रामसभेंतूय हाका विरोध जावपाक लागला.
आयतारा बर्याच ग्रामपंचायतींच्यो ग्रामसभा जाल्यो. आगरवाडा – चोपडें पंचायतीचे ग्रामसभेंत सनबर्न महोत्सवाचेर चर्चा जाली. मोपा सनबर्न महोत्सव घेवपाक लोकांनी विरोध केलो. पार्टी म्हटले काय गैरप्रकार जाताच. पेडणें म्हालाची संस्कृती तशेंच दायजाची जतनाय जावपाक जाय. सनबर्न सारकी पार्टी पेडणें म्हालाक परवडपाची ना, असो ग्रामसभेंत सगल्या लोकांचो सूर आशिल्लो.
राज्यांत सनबर्न महोत्सव बरीच वर्सां जालीं जाता. कोरोनाचो काळ सोडलो जाल्यार दर वर्सा सनबर्न महोत्सव जाला. वागातोरा हो महोत्सव सुरू जाल्लो तेन्नाय ह्या महोत्सवाक विरोध जाल्लो. अंदुंचो महोत्सव सरकार आनी खासगी कंपनी हांच्या जोड पालवान आयोजीत करपाचो प्रस्ताव आसा. महोत्सवाचें थळ मात आजूनय निश्चीत करूंक ना. आयज आयतारा नावेली, बस्तोडा, कुडतरी अशा बऱ्याच पंचायतींनी ग्राम सभा जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
