भांगरभूंय | प्रतिनिधी
वेर्णेंच्या एन्टीक मार्डोल रॅस्टोरंण्टांत कुटुंबां सयत घेतलें जेवण
मुरगांव: भारताचो नामनेचो क्रिकेट खेळगडो सचीन तेंडुलकर आपल्या कुटुंबां सयत गोंयांत दाखल जाला. काल (शुक्रारा) ताणें वेर्ण्यां एन्टीक मार्डोल ह्या हॉटेलांत आपल्या कुटुंबा सयत जेवणाचो आस्वाद घेतलो.
भारताचो नामनेचो बॅटसमन सचीन तेंडुलकर गोंयांत येता तेन्ना ताची पयली पसंदी गोवन फीश करी रायस प्लेट आसता. हो ताचो खास मेनू आसा. मजगतीं, तेंडुलकार आपल्या कुटुंबा सयत म्हणल्यार ताची घरकान्न अंजली तेंडुलकर, धूव सारा तेंडुलकर आनी पूत अर्जून तेंडुलकर हांचे सयत गोंयच्या सैमाचो आस्वाद घेवपा खातीर, आनी गोंयची फीश करी रायस प्लेट जेवणाचो आस्वाद घेवपा खातीर गोंयांत दाखल जाला.
काल ताणें दनपारां वेर्णेंच्या एन्टीक मार्डोल ह्या रॅस्टोरंण्टांत वचून खास ‘एन्टीक मार्डोल’ थाळीचो आस्वाद घेतलो. हे थाळींत ताणें ताच्या आवडीचो जिन्नस म्हणल्यार ‘कुल्ल्यांचें धबधबीत’ हाचेर ताव मारलो. तशेंच सोलर सुंगटाची फिशकरी रायस अशा सुवादीक जेवणाचो ताणें आपल्या घरच्यां सयत आस्वाद घेतलो.
ह्या वेळार एन्टीक मार्डोलचे धनी प्रदीप शेट आनी तांची घरकान्न प्रियंका शेट हांणी सचीन तेंडुलकर हांकां फुलांतुरो दिवन येवकार दिलो. तेंडुलकरान तांच्या ‘एन्टीक मार्डोल’ थाळयेची तोखणाय केली आनी आपली सरबराय केल्ले खातीर उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
