भांगरभूंय | प्रतिनिधी
वॉशिंग्टनः संवसारांतले लोकसंख्येन अधिकृतपणान ८ अब्जांची मर्यादा हुंपल्या. अमेरिकेच्या जनगणना ब्युरोन ही म्हायती जाहीर केल्या. ब्युरोच्या म्हणण्या प्रमाण, हो टप्पो २६ सप्टेंबर २०२३ दिसा गेलो आनी संवसारीक पांवड्यार वेगवेगळ्या गजालींक शास्त्रीय नदरेन पळयल्यार लोकसंख्येचो स्फोट हो सगळ्यांत व्हडलो मुद्दो जावपाचो आसा. ह्यान पयलीं जोड राश्ट्रांनीय फाटल्या वर्सा २२ नोव्हेंबर २०२२ दिसा ८ अब्जांचें निशाण हुपलां, अशें जाहीर केल्लें, पूण शास्त्रज्ञ तो डेटा अधिकृतपणान मान्य करिनात.
खरें म्हणल्यार भारत, नायजेरिया, उदेंत युरोपांतले कांय देश, अस्तंत आशियांतल्या कांय देशांनी आनी अर्द्या परस चड आफ्रिकन देशांनी फाटल्या धा वर्सांत आपले अधिकृत लोकसंख्येचे आंकडे जाहीर करूंक नात. जनगणनेंत विसंगती, मनशाचे संकश्ट, सैमीक संकश्ट, संवसारांतल्या वेगवेगळ्या वाठारांनी झुजाचे परिस्थितीक लागून स्थलांतर, वेगवेगळ्या देशांनी जनगणनेच्यो वेगवेगळ्यो पद्दती आनी जायत्या अडचणींक लागून हे जनगणनेचे आंकडे उक्ते जावंक ना हींय हाचे फाटलीं कांय मुखेल कारणां जावन आसात. सगळ्यांत व्हडली समस्या म्हळ्यार कांय अविकसीत आनी विकसीत देशांनी मरण आनी जल्म हांची नोंद दवरपाची पद्दत अस्तित्वांत ना. तातूंत १९६० ते २००० ह्या काळांत संवसारांतली लोकसंख्या दुपेटीन वाडल्या उपरांत संवसारीक पांवड्यार लोकसंख्येची वाड मंदावल्या.
कॅनडा सारक्या देशांनी जाण्टेपणांतल्यान मरण येवपाचें प्रमाण उणें जायत आसा, जाल्यार नायजेरिया सारक्या देशांनी पांच वर्सां सकयल्या भुरग्यांचें मरण उणें जालां. जपान, चीन, फिलीपीन्स, कंबोडिया, पापुआ न्यू गिनी, ओशिनिया तशेंच तुर्कमेनिस्तान, आझरबैजान आनी रशियेचे उदेंत-दक्षीण वाठारांतल्या कांय वाठारांनी मरण येवपाचें प्रमाण उणें जाल्ल्यान आनी जल्मांचें प्रमाण वाडूंक नाशिल्ल्यान जायत्यो समस्या निर्माण जाल्यात. संवसारीक सरासरी पिराय ३२ वर्सां वाडत आसा. २०६० वर्सा हो आंकडो ३९ मेरेन वाडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
