भांगरभूंय | प्रतिनिधी
चार लाखांचो म्हालवज फारायलो
म्हापशें: शेळपें, धुळेरा क्लेमेंट रेसिडेन्सी ह्या इमारतींतल्या पयल्या माळ्यार शिवाणी अरूण जांबावलीकार हांचो दिसा उजवाडा फ्लॅड फोडून अनवळखी चोरांनी भांगरा वस्ती आनी रोख रक्कम मेळून 4 लाखांचो म्हालवज फारायलो.
ही चारयेची घडणूक शुक्रारा सांजवेळा 5 ते 5.30 वरां मजगतीं घडली. जाल्यार ही घडणूक सांजवेळा सुमार 7.30 वरांचेर उक्तडार आयली. जांबावलीकार हांचे चलयेचें फुडल्या म्हयन्यांत लग्न आशिल्लें. ताचे पयलींच चोरांनी भांगर फारायिल्ल्यान ह्या कुटुंबाक धक्को बसला.
कागाळदार जांबावलीकार कुटूंब दिवाळेचे खरेदी खातीर म्हापश्यां गेल्लें. हीच संद सादून चोरांनी ह्या फ्लॅटांत चोरी केली.
अनवळखी चोरांनी फ्लॅटाच्या मुखेल दाराचे कुलप सळयेन फोडलें आनी भितर प्रवेश केलो. ह्या चोरांनी बॅडरुमांतले आलमारींत दवरिल्लें भांगर आनी 30 हजार रुपया रोख फारायले. भांगरा वस्ती मदीं हार, बांगड्यो, कानांतलीं, मुदी आनी हेर भांगराच्या वस्तींचो आस्पाव आसा.
घडणुकेची म्हायती मेळटकूच म्हापशेंचे पुलीस उपनिरिक्षक सुनील पाटील, बाबलो परब, हवालदार सुशांत चोपडेंकार हांणी सहकाऱ्यां सयत घडणूक थळार धांव घेतली आनी पंचनामो केलो. पुलिसांनी ह्या प्रकरणांत भादंसंच्या 454, 457, 380 आनी 34 कलमा खाला गुन्यांव दाखल केला. ठशे तज्ञ आनी वास घेवपी सुण्यांचो उपेग केलो. फुडलो तपास पुलीस करतात.
कांय शेजाऱ्यांनी ह्या इमारतीचे भायर एक कर्नाटकांत नोंदणी केल्ली मोटार उबी आशिल्ली. इमारतीच्या सोंपणा वेल्यान तीन अनवळखी मनीस देंवतना पळयिल्ले. आमी फ्लॅट खरेदी खातीर आयल्यात अशी फट तांणी मारिल्ली आनी उपरांत मोटारींत बसून ते गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
